Asebter amenzawi
Tifranin n umni deg Burkina Faso: d akabar n uselway Kabore ay irebḥen
OUAGADOUGOU – D akabar n uselway ufrin Roch Marc Christian Kabore ay irebḥen deg tefranin tiwamniyin (barlamaniyya) n Burkina Faso, ula ma ur d-yewwi ara tigti tamagdezt (aɣlabiyya muṭlaqa) ɣef wkaken ay d-iban deg yigmaḍ unṣiben ay d-tessuffeɣ tseqqamut n tefranin ass n laṛebɛa.
Amussu n Uɣref i Ufara (MPP) yerbeḥ-d 55 n yimukan seg gar 127 yellan deg Ugraw Aɣelnaw n Burkina Faso, ma d akabar n Tdukli i Ufara d Ubeddel (UPC) n Zephirin Diabre yerbeḥ-d 33 n yimukan. I usmekti, Diabre yessers-d daɣ iman-nnes i tefranin tiselwayanin n wass n lḥedd, maca ur yerbiḥ ara.
Akabar n Tdukli i Ufara d Ubeddel n Diabre ttwalin-t d netta ay d akabar wis sin ay iǧehden akk deg tmurt. Ma d akabar wis 3 deg tefranin-a d Aswir i Tugdut d Ufara (CDP) yellan d akabar aqbur n uselway yettwafesxen, Blaise Compaore, yerna ṣaḥen-as-d 18 n yimukan.
Akabar Asankari yewwi-d 5 n yimukan, yerna llan azal n 15 n yikabaren imeẓyanen niḍen ay d-yewwin ddaw 5 n yimukan.
Mass Kabore yettwafren d aselway deg tuzzya tamezwarut n tefranin tiselwayanin n wass n lḥedd s 53% n tuɣac, ma d Diabre ṣaḥent-t-id 30% n tuɣac.
Afmiḍi (nisba) n uttekki deg tefranin tiwamniyin ay d-yellan ass-nni ya kan yewweḍ ɣer 60,13%, ma d afmiḍi n uttekki deg tefranin tiselwayanin yewweḍ ɣer 60%.