Asebter amenzawi

Sudan n Unẓul: ugar n 4000 n yimdanen ay irewlen ɣer Tegduda Tamegdayt n Kungu

Nyu YRK (Iɣlanen Yeddukklen) – Imenɣi deg Sudan n Unẓul yessaweḍ 4000 n yimdanen ad rewlen ɣer Tegduda Tamegdayt n Kungu, ɣef leḥsab n Useqqamu Unnig n Yiɣlanen Yeddukklen i Yizrazaɣen (laǧi’in).

Imenɣiyen ay d-yellan seg melmi kan gar yigen (ǧayc) n Sudan n Unẓul d tegrawin timsellḥin n temnaḍt n Equatoria n tmurt-a ḥettmen 4000 n yimdanen ad rewlen ɣer yiwet n temnaḍt tuɛzilt n Tegduda Tamegdayt n Kungu, ɣef wakken ay d-yenna Useqqamu Unnig n Yiɣlanen Yeddukklen i Yizrazaɣen.

Deg yiwen n umyager d tɣemsa, yenna-d uneṭṭaq n Useqqamu Unnig n Yiɣlanen Yeddukklen i Yizrazaɣen, Adrian Edwards, d akken snat n teɣlamin n Useqqamu-a ḥesbent-d 3464 n yimdanen ay d-yewwḍen ɣer temnaḍt n Dungu deg Kungu Tamegdayt, d tamnaḍt yellan ɣef tlisa n Sudan n Unẓul.

ɣef leḥsab n tlisa-a, 1206 n yizrazaɣen ikunguliyen ay yellan, naqal, ddren deg Sudan n Unẓul, rewlen ula d nitni ɣer temnaḍt-a mi yenker yimenɣi, ɣef wakken ay d-yenna uneṭṭaq-a.

Amazir (muxayyam) n Ezo, deg Sudan n Unẓul, aydeg llan naqal 3300 n yizrazaɣen ikunguliyen, atan imir-a d ilem, yerna tiwaculin tineggura n yizrazaɣen ay yellan din rewlent ɣer yigran ay d-yezzin ɣef umazir-a.

Ammeṛki n yizrazaɣen deg Tegduda Tamegdayt n Kungu mazal-it la yettkemmil deg temnaḍin ay iqerben ɣer tlisa d Sudan n Unẓul yerna mazal la d-ttawḍen yizrazaɣen imaynuten. Tanarit (maktab) ay iqerben akk n Useqqamu Unnig n Yiɣlanen Yeddukklen i Yizrazaɣen yebɛeb s 400 n yikilumitren ɣef temnaḍt-a, deg Bunia, yerna ixeddamen n tnarit-a wten acḥal n wussan akken ad awḍen ɣer temdinin aydeg llan yizrazaɣen-a, ɣef leḥsab n uneṭṭaq-a.