Asebter amenzawi

Assemɣer n wakal yettwasswen: asseǧhed n tzemmar

ṬṬAREF – Assemɣer n wakal yettwasswen ad d-yili s usseǧhed d uqeyyem n tzemmar yellan yagi d usnefli (taṭwir) n tmiwa timaynutin s ttawilat n ussway ɣef wakken ay d-iwekked ass n lḥedd deg Ṭṭaref uneɣlaf n tfellaḥt, Sid-Ahmed Ferroukhi.

Ccɣel-a yella-d d aḥric seg ussefɛel n lewṣayat n uselway n tegduda, Abdelaziz Bouteflika, deg wayen yerzan assemɣer n wakal yettwasswen arma yewweḍ ɣer 2 n yimelyunen n yiqeṭṭaren seg-a ɣer 2019, ɣef wakken ay d-yenna uneɣlaf ay d-yessawlen deg yiwen n umsegraw amnaḍan i ussefɛel n wahil n ussemɣer n wakal yettwasswen aydeg ttekkant 25 n twilayin n ugmuḍ (carq) d unẓul-agmuḍan n tmurt.

Iswi n wahil-a, ɣef wakken ay d-yenna, netta d aḍman n ussefrek (tasyir) yelhan ugar n teɣbula n waman ad yettwasqdecen i tfellaḥt, yerna yella-d waya d « ccerḍ n llsas » i uḥraz n lɣella taɣelnawt n tfellaḥt.

Iwekked-d Mass Ferroukhi d akken la d-yettili wussis (maǧhud) i uḥraz n yikalen yettwasswen s uḍfar n yiwen n uɣawas (muxaṭṭaṭ) n umɛawen gar yiɣlifen n tfellaḥt d teɣbula n waman. Ma deg twilayt n Ṭṭaref, yenna-d Mass Ferroukhi d akken llan 12.500 n yiqeṭṭaren n wakal yettwasswen akal-a ad yettwassemɣer ɣer 20.000 n yiqeṭṭaren seg-a ɣer 2019.

Uqbel aya, yerza uneɣlaf ɣef temdint n Lqala anda ay yerẓem yiwen n usagen (mina’) n ṣṣyada n yiselman. Asagen-a yesqam-d assefti n 6,3 n yimelyaṛen n yidinaṛen. Tamda n usagen-a zemren ad ḥebsen deg-s 142 n yiɣerruba, gar-asen 53 n yiɣerruba n ṣṣyada n userdin d 11 n yiɣerruba n ṣṣyada n yiselman. Asagen-a yesɛa tajumma n 5,3 n yiqeṭṭaren, yerna tajumma-nnes n wakal tewweḍ ɣer 6,1 n yiqeṭṭaren.

Yessefqed daɣ Mass Ferroukhi asenfar n uheyyi n uzaɣar n Ṭṭaref aydeg llan 12.500 n yiqeṭṭaren. Asenfar-a yebḍa ɣef 3 n yiḥricen, amezwaru yebda deg 2008 yerna ifuk deg 2012.