Asebter amenzawi

Libya: assebded n lḥukuma n tdukli taɣelnawt seg-a ɣef wayyur

ṬRABLES – Idisan ilibiyen yemxaṣamen zemren ad stenyin amtawa (ittifaq) i ussebded n unabaḍ n tdukli taɣelnawt seg-a ɣef wayyur ɣef wakken ay d-yenna umazun (mabɛut) n Yiɣlanen Yeddukklen, Martin Kobler.

« Idisan ilibiyen yemxaṣamen zemren ad stenyin, deg ledwaṛ ay d-yetteddun, amtawa i ussebded n unabaḍ n tdukli taɣelnawt, yerna anabaḍ-a ad yebdu axeddim beṛṛa i Ṭrables seg leɛḍil ad frunt tlufa n tɣellist (amn) deg tmaneɣt (talibit) » ɣef wakken ay d-iwekked Mass Kobler ass n ssebt.

« Taluft n Libya msefhamen akk fell-as leǧnas », ɣef wakken ay d-iwekked umazun deg tgara n yiwen n umyager ay iga d uselway n Useqqamu n Yigensasen (mumattilin) (amni [barlaman] alibi ayyes steɛṛfen leǧnas yerna yella deg Ṭubruq), Akila Saleh Kouider.

Dɣa deg tegnit-a ad d-tili, deg wussan ay d-yetteddun, temlilit tagraɣlant ɣef taluft talibit deg Ṛuma, ɣef wakken ay d-ixebber Mass Kobler.

« Beḍḍu n tmurt (Libya) ur yeffiɣ ula ɣef yiwen n yidis, ladɣa imi tuddsa ay isemman i yiman-nnes Awanak Islaman (Daɛec) la tetteddu ɣer sdat », ɣef wakken ay d-iwekked, am wakken ay d-yesmekti d akken tiyitiwin ay la tettaɣ Daɛec deg Surya teḥṛes tagrawt-a tarebrabt akken ad teẓẓu iman-nnes deg Libya.

Seg yidis niḍen, yenced-d umazun n Yiɣlanen Yeddukklen idiplumatiyen ibeṛṛaniyen d tuɣdaḍt n Yiɣlanen Yeddukklen akken ad uɣalen ɣer Libya yerna ad bedden i lmend n tmurt-a deg wussisen-nnes (maǧhudat) akken ad tefru tilufa-nnes n tɣellist, n tsertit d tsuda.