Asebter amenzawi
AADL 2: axelleṣ n uḥric wis sin deg Yennayer
LEZZAYER TAMANEɣT – Yenna-d uneɣlaf n tnezduɣt d temdint, Abdelmadjid Tebboune, ass n letniyen deg Lezzayer Tamaneɣt, d akken aḥric wis sin n uxelleṣ n tnezduɣin n wahil n AADL 2 ad d-yili deg Yennayer, yerna wid ad ixellṣen ad d-ḍḍfen aɣtas n usfaydi seg tnezduɣt deg Mayu n 2016.
Mass Tebboune ay d-yettwaɛerḍen ɣer unmager n uɣmis n Echaab yenna-d d akken « wid yemmeṛkan ɣer wahil n AADL 2013 ad xellṣen aḥric wis sin, 5% seg wazal n tnezduɣt-nsen, ma aṭas, deg Yennayer n 2016 yerna ad d-ḍḍfen aɣtas (qarar) n usfaydi-nsen seg tnezduɣt deg Mayu n useggas-nni ».
Iwekked-d, seg yidis niḍen, d akken tukci n yiɣtasen n usfaydi seg tnezduɣt i wid yemmeṛkan deg 2001 d 2002 ad d-yili seg 8 Fuṛaṛ n 2016 d asawen.
Mass Tebboune yesmekti-d d akken awanak (dawla) la yettḍafar seg 1999 tasertit-nnes akken ad ifak taluft n tnezduɣt, yerna iwekked-d d akken gar yiseggasen n 80 d useggas n 2000, iban-d d akken Lezzayer xuṣṣent-t 3 n yimelyunen n tnezduɣin ɣef lǧal n tegnit tadamsant d tɣellisant (amniyya) taweɛṛant ayɣef tekka tmurt.
2,5 n tnezduɣin ay yettwaferqen deg ukatar n wahilen n 5 n yiseggasen ay d-yellan seg 1999 ar ass-a, yerna 720 000 n yissutren n tnezduɣt ay d-mazal ad d-lhun yid-sent deg wahil n 5 n yiseggasen n 2015-2019.
Deg wayen yerzan tukksa n tnezduɣin ixuṣṣen d yibeṛṛaken, yenna-d Mass Tebboune d akken aɣlif-nnes la yessefray ad yaweḍ ɣer yiswi-nnes deg wakud-nni ay d-yettwaḥudden (2017) yerna la yessaram ad yerr Lezzayer Tamaneɣt d tamaneɣt n Tefriqt d umaḍal aɛṛab, yerna ahat, n Yilel Agrakal aydeg ur ttilin ara akk yibeṛṛaken seg-a ɣer 2016.
« Tasuddest-nneɣ (istratiǧiyya) nettat d ferru n taluft-a i lebda uqbel ma ifuk wahil n 5 n yiseggasen n yimir-a, sakkin ad d-taweḍ tallit aydeg lebni n tnezduɣt ad d-yettili ɣef leḥsab n ussuter ».
Deg wayen yerzan assefɛel n wahil n 5 n yiseggasen n 2015-2019 i temnaḍin n unẓul (ǧanub) d Yignan Unnigen, yenna-d Mass Tebboune d akken azal n 400.000 n tikkas n wakal ay yettwammeṛkan deg twilayin n temnaḍin-a yerna ixebber-d d akken medden zemren ad d-sfaydin deg waya ula deg twilayin n ugafa (camal), ladɣa deg tɣiwanin n ddaw n 5000 n yimezdaɣen.
