Asebter amenzawi

Tiɣri i tkebbaniyin akken ad ssiǧwent sselɛa yexḍan apitṛul d lgaz

LEZZAYER TAMANEɣT – Tger-d tiɣri Texxamt Tadzayrit n Tnezzut d Temguri ass n letniyen deg Lezzayer i yimḍebbren n tkebbaniyin tidamsanin tidzayriyin akken ad xemmement ɣef ussiǧew n sselɛa menɣir apitṛul d lgaz.

« Nebɣa ad nessidef takti n ussiǧew ɣer tkebbaniyin tidzayriyin akken ad wehhint iman-nsent ɣer ssuq agraɣlan », ɣef wakken ay d-tenna tnemhalt n wassaɣen igraɣlanen deg Texxamt Tadzayrit n Tnezzut d Temguri (ṣinaɛa), Ouahiba Bahloul, deg yiwen n wass n uxebber d ussileɣ ɣef tlujistit n ussiǧew.

Amyager-a yettekka deg-s umazzay (xabir) anemciweṛ Abdnour Sidisaid yerna iswi-nnes d aɛawen n tkebbaniyin akken ad ssnent tarrayin igerrzen akk deg uzrar (silsila) alujisti deg wayen yerzan assiǧew.

Iwekked-d Mass Sidisaid d akken yessefk ad d-sfehmen i tkebbaniyin tidamsanin immektiyen (mafahim) n uzrar alujisti deg wayen yerzan assiǧew akken ad ssnent aya mliḥ yerna ad ssiwḍent ad sɛunt amkan deg leswaq igraɣlanen s lqis alemmas d wubɛid.

ɣef leḥsab n Massa Bahloul, aṭas n tkebbaniyin tidzayriyin ay yesɛan ifarisen (mantuǧat) n tɣara yelhan maca la ten-snuzuyent kan deg ssuq aɣelnaw ɣef lǧal n waṭas n yiɛewwiqen, gar-asen lqella n tmussni n leqwanin yerzan tanezzut tagraɣlant.