Asebter amenzawi

Tixazzabiyin n Čad: Tadukli Tafriqit mgal rrebrab

ADDIS ABEBA – Twet-d Tdukli Tafriqit s teqseḥ deg 3-nni n txazzabiyin ay d-yellan deg ssuq n Loulou Fou, deg yiwet n tegzirt n ugelmim n Čad, yerna tɛawed twekked-d d akken « ur testeɛṛif ara akk s rrebrab d tiḍḍurfa tukriḍt (ɛanifa) ».

« Taselwayt n Tseqqamut n Tdukli Tafriqit, Tadukturt Nkosazana Dlamini-Zuma, tesḥassef ɣef txazzabiyin-nni tirebrabin ay d-yellan … deg tegzirt n Koulfoua, d tid yegal s 27 n tmeddurin yerna jerḥent ugar n 80 n yimdanen niḍen », ɣef wakken ay d-yenna ulɣu (bayan) n Tdukli Tafriqit.

« Twet-d s lǧehd deg txazzabiyin-a tuḥqirin yerna tɛawed twekked-d aɣanfu ummid n Tdukli Tafriqit i rrebrab d tiḍḍurfa tukriḍt ur yessefken ara ad ttwaqeblen akken tebɣu tili tegnit », ɣef wakken ay d-yenna ulɣu-a.

S waya, tessenfali-d (ɛabbarat) Massa Dlamini-Zuma tamsetlelt (taḍamun) n Tdukli Tafriqit ɣer yidis n unabaḍ d uɣref n Čad, yerna twekked-d d akken tummɣiwin-a d « tiɣri iǧehden ay d-yesmektayen d akken mazal tuggza (tahdid) n rrebrab d tiḍḍurfa tukriḍt tella deg Tefriqt ».

Tger-d tiɣri tselwayt n Tdukli Tafriqit i usseǧhed n umɛawen gar tmura tifriqiyin i yimenɣi mgal uxeṣṣar-a, yerna yessefk ad d-yili waya s usseqdec n ttawilat ifriqiyen d yigraɣlanen ay iwatan.

« Ad tkemmel Tseqqamut axeddim d tmura ay yettekkan akken ad yettwasseǧhed wussis (maǧhud), ladɣa deg wayen yerzan Iɣallen Igtaɣlanen Uxliḍen ay d-snulfant tmura yettekka deg Tseqqamut n Temda n Ugelmim n Čad d Benin akken ad nnaɣent mgal tegrawt tarebrabt n Boko Haram », ɣef wakken ay tt-id-yextem ulɣu-nni.

Tamnaḍt n ugelmim n Čad zgant ttilint-d deg-s tummɣiwin tirebrabin n tegrawt n Boko Haram.

Ass n 10 Tubeṛ yezrin, 41 n yimdanen ay yettwenɣen yerna jerḥen 48 n wiyaḍ deg yiwen n ssuq n dduṛt deg Baga Sola, tamdint tameqrant tis snat deg temnaḍt n ugelmim-a anda ay ddren 6000 n yizrazaɣen (laǧi’in) ay d-yusan seg Nijir d Nijirya.