Asebter amenzawi

JSM Bgayet tɛewwel ad tefru taluft-nnes d Saighi

LEZZAYER TAMANEɣT – Tɛewwel teɣlamt n JSM Bgayet ad tefru taluft-nnes d umarir Abderrahmane Saighi « deg wussan ay d-yetteddun » akken ad yettwakkes uɛaqeb ay tt-tɛuqeb Tfidiṛalit Tadzayrit n Tcirt n Uḍar. Yuɣ lḥal, taɣlamt-a tegdel-as Tfidiṛalit ad d-tessidef imariren imaynuten ma ur tefri ara taluft-nnes d Saighi, yerna ɣef waya ay tebɣa ad tt-tefru ussan-a ladɣa imi tallit n ussidef n yimariren n tegrast ad tebdu deg 15 Dujembeṛ.

« Deffir ma yeffeɣ-d ulɣu (bayan) n Temɣunt n Tcirt n Uḍar Tasadurant deg usmel-nnes unṣib ɣef tegnit n waṭas n teɣlamin d Tseqqamut n Ferru n Yimgerraden, gar-asent taluft n JSM Bgayet, tebɣa ad d-txebber teɣlamt d akken tessaweḍ ad temsefham d umarir Saighi Abderrahmane, yerna d netta ay d amarir awḥid ay yessersen akaram (milaf) ɣer Tseqqamut n Ferru n Yimgerraden », ɣef wakken ay d-tenna teɣlamt-a n Bgayet n Temɣunt tis 2 deg usmel-nnes Internet.

« Taɣlamt n JSM Bgayet ad txelleṣ ayen ay as-yettalas umarir-a deg wussan ay d-yetteddun », ɣef wakken ay d-terna teɣlamt-a.

Tiɣlamin n RC Laṛebɛa (Tamɣunt 1ut), JSM Bgayet, MC Ssɛida, OM Arzew, CA Tabatent, O Lemdeyya, CAB Lbuṛj Buɛṛiṛij, JSM Skikda d USMM Ḥeǧǧuṭ (Tamɣunt tis 2) yettwagdel-asent akk ad ttekkint deg tallit n ussidef n yimariren n tegrest ma ur frint ara uguren-nsent n tedrimt d yimariren-nsent iqburen ɣef zik lḥal, ɣef wakken ay d-tenna Tfidiṛalit Tadzayrit n Tcirt n Uḍar deg temlilit-nnes n wass n lḥedd.

Seg yidis niḍen, tamehla (idara) n JSM Bgayet tebɣa ad tesseǧhed taɣlamt-nnes deg tallit-a n ussidef n yimariren, yerna temsefham d 3 n yimariren akken ad d-adfen ɣer-s deg tallit-a, war ma tekcef-d ismawen-nsen.

Taɣlamt n JSM Bgayet d tis 4 deg usettef n Temɣunt tis 2 yerna mazal-as yiwen kan n umkan akken ad tesɛu azref ad tali ɣer Temɣunt Tamezwarut (imi ala 3 n teɣlamin timezwura ad yalin).