ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⴰⵏⵙⴻⵊ ⵜⴻⴼⴽⴰ ⵜⴰⴷⵔⵉⵎⵜ ⵉ ⵡⵓⴳⴰⵔ ⵏ 350.000 ⵏ ⵜⴽⴻⴱⴱⴰⵏⵉⵢⵉⵏ ⵜⵉⵎⴻⵥⵢⴰⵏⵉⵏ ⵙⴻⴳ 1996
ⵎⴻⵙⵜⵖⴰⵏⴻⵎ – ⵜⴰⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵓⴷⵀⴰⵍ ⵏ ⵓⵙⵙⴻⵎⵔⴻⵙ ⵏ ⵢⵉⵍⴻⵎⵥⵉⵢⴻⵏ (ⴰⵏⵙⴻⵊ) ⵜⴻⴼⴽⴰ ⵉⴷⵔⵉⵎⴻⵏ ⵉ ⵓⵙⵙⴻⴱⴷⴻⴷ ⵏ 350.000 ⵏ ⵜⴽⴻⴱⴱⴰⵏⵉⵢⵉⵏ ⵜⵉⵎⴻⵥⵢⴰⵏⵉⵏ ⴷⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵏ ⵜⵎⵓⵔⵜ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⵏⵏⵓⵍⴼⴰ ⴷⴻⴳ 1996, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ-ⵏⵏⴻⵙ ⴰⵎⴰⵜⵓ ⴰⵙⵙ ⵏ ⵍⴰⵕⴻⴱⵄⴰ ⴷⴻⴳ ⵎⴻⵙⵜⵖⴰⵏⴻⵎ.
ⵜⵉⴽⴻⴱⴱⴰⵏⵉⵢⵉⵏ-ⴰ ⵙⵏⵓⵍⴼⴰⵏⵜ-ⴷ ⵓⴳⴰⵔ ⵏ ⵓⵎⴻⵍⵢⵓⵏ ⵏ ⵢⵉⵎⵓⴽⴰⵏ ⵏ ⵓⵅⴻⴷⴷⵉⵎ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵣⵧⵓⴰⵧⵓⵉ ⴰⴱⴷⴻⵍⵀⴰⵎⵉⴷ ⴷⴻⴳ ⵢⵉⵊⵉⴼⴻⵕ ⵏ ⵜⵎⴻⵙⵔⵉⵜ (ⵚⴰⵍⵓⵏ) ⵏ ⵜⴽⴻⴱⴱⴰⵏⵉⵜ ⵜⴰⵎⴻⵥⵢⴰⵏⵜ ⴰⵢ ⵉⵔⴻⵥⵎⴻⵏ ⴷⴻⴳ ⵜⴻⵙⴷⴰⵡⵉⵜ ⵏ ⴰⴱⴷⴻⵍⵀⴰⵎⵉⴷ ⵉⴱⵏ ⴱⴰⴷⵉⵙ ⵏ ⵎⴻⵙⵜⵖⴰⵏⴻⵎ.
ⵢⴻⵏⵏⴰ-ⴷ ⴷⴰⵖ ⵓⵏⴻⵎⵀⴰⵍ ⴰⵎⴰⵜⵓ ⵏ ⵜⵏⴻⴳⴳⴰ ⵏ ⴰⵏⵙⴻⵊ ⴷ ⴰⴽⴽⴻⵏ 20.000 ⵏ ⵜⴽⴻⴱⴱⴰⵏⵉⵢⵉⵏ ⵜⵉⵎⴻⵥⵢⴰⵏⵉⵏ ⴰⵢ ⴷ-ⵢⴻⵏⵏⵓⵍⴼⴰⵏ ⴷⴻⴳ ⵓⵙⴻⴳⴳⴰⵙ ⵏ 2015 ⴷⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵏ ⵜⵎⵓⵔⵜ ⵢⴻⵔⵏⴰ ⵙⵏⵓⵍⴼⴰⵏⵜ-ⴷ 60.000 ⵏ ⵢⵉⵎⵓⴽⴰⵏ ⵏ ⵓⵅⴻⴷⴷⵉⵎ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷ ⴰⴽⴽⴻⵏ ⵜⴰⵏⴻⴳⴳⴰ-ⵏⵏⴻⵙ ⴰⴷ ⵜⴻⵔⵏⵓ ⴰⴷ ⵜⴻⴼⴽ ⵜⴰⴷⵔⵉⵎⵜ ⵉ ⵢⵉⵙⴻⵏⴼⴰⵔⴻⵏ ⴰⴷ ⵢⴻⵜⵜⴻⴽⴽⵉⵏ ⴷⴻⴳ ⵓⵙⵏⴻⴼⵍⵉ (ⵜⴰⵏⵎⵉⵢⴰ) ⴷ ⵓⵏⵏⴻⵔⵏⵉ (ⵏⵓⵎⵓⵡ) ⴰⴷⴰⵎⵙⴰⵏ ⵏ ⵜⵎⵓⵔⵜ ⵖⴻⴼ ⵍⴻⵃⵙⴰⴱ ⵏ ⵡⴰⵢⴻⵏ ⵜⴻⵃⵡⴰⴵ ⵢⴰⵍ ⵜⴰⵡⵉⵍⴰⵢⵜ.
ⵜⴰⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵓⴷⵀⴰⵍ ⴷ ⵓⵙⵙⴻⵎⵔⴻⵙ ⵏ ⵢⵉⵍⴻⵎⵥⵉⵢⴻⵏ (ⴰⵏⵙⴻⵊ) ⴰⴷ ⵜⴻⴱⴷⵓ ⵜⵉⴷⴷⵉⵜ ⴰⵢⴷⴻⴳ ⴰⴷ ⵜⴻⴳ ⵉⴼⴰⴷⴷⴻⵏ ⵉ ⵓⴱⴷⴰⵄ ⴷⴻⴳ ⵓⵙⵙⴻⴱⴷⴻⴷ ⵏ ⵜⴽⴻⴱⴱⴰⵏⵉⵢⵉⵏ, ⵉⵎⵉ ⴰⵢⴰ ⴰⴷ ⴷ-ⵢⴻⵔⵏⵓ ⵍⴼⴰⵢⴷⴰ ⵉ ⵜⴷⴰⵎⵙⴰ ⵜⴰⴷⵉⴳⴰⵏⵜ (ⵎⴰⵃⴰⵍⵍⵉⵢⵢⴰ) ⴷ ⵜⵖⴻⵍⵏⴰⵡⵜ ⵢⴻⵔⵏⴰ ⴰⴷ ⴷ-ⵢⴻⵙⵏⵓⵍⴼⵓ ⵉⵎⵓⴽⴰⵏ ⵏ ⵓⵅⴻⴷⴷⵉⵎ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ ⴰⵎⴰⵜⵓ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵡⴻⴽⴽⴻⴷ ⴷ ⴰⴽⴽⴻⵏ ⴽⵔⴰ ⵏ ⵢⵉⵙⴻⵏⴼⴰⵔⴻⵏ ⵢⴻⵇⵇⵏⴻⵏ ⵖⴻⵔ ⵓⵎⴻⵙⵏⵉ (ⵏⴰⵇⵍ) ⴷ ⵜⵏⴻⵖⵔⵓⵎⵜ (ⵎⴰⵅⴱⴰⵣⴰ) ⴰⴷ ⵜⵜⵡⴰⵃⴻⴱⵙⴻⵏ ⵉⵎⵉ ⴰⵢ ⵢⴻⵞⵞⵓⵕ ⵙⵙⵓⵇ ⵙⴻⴳ-ⵙⴻⵏ.
ⵎⴰ ⴷ ⴰⵡⴰⵍⵉ ⵏ ⵎⴻⵙⵜⵖⴰⵏⴻⵎ, ⴰⴱⴷⴻⵍⵡⴰⵀⵉⴷ ⵜⴻⵎⵎⴰⵔ, ⵉⴳⴻⵔ-ⴷ ⵜⵉⵖⵔⵉ, ⴷⴻⴳ ⵜⴻⴳⵏⵉⵜ-ⴰ, ⵉ ⵢⵉⵍⴻⵎⵥⵉⵢⴻⵏ ⴰⴽⴽⴻⵏ ⴰⴷ ⴱⴻⴷⵄⴻⵏ ⴷⴻⴳ ⵓⵙⵙⴻⴱⴷⴻⴷ ⵏ ⵜⴽⴻⴱⴱⴰⵏⵉⵢⵉⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵉⵅⴻⴱⴱⴻⵔ ⴷ ⴰⴽⴽⴻⵏ « ⵓⵔ ⵜⴻⵜⵜⵄⴻⴹⴹⵉⵍ ⴰⵔⴰ » ⴰⴷ ⴷ-ⵜⵉⵍⵉ ⴷⴷⵓⵕⵜ ⵜⴰⵎⵙⴻⵏⵣⵉⵜ (ⵜⵉⴵⴰⵔⵉⵢⵢⴰ) ⵉ ⵓⵙⵎⴰⵍ (ⵜⴰⵔⵇⵉⵢⴰ) ⵏ ⵙⵙⴻⵍⵄⴰ ⴰⵢ ⴷ-ⵢⴻⵜⵜⵡⴰⵅⴷⴰⵎⴻⵏ ⴷⴻⴳ ⵜⴻⵎⵏⴰⴹⵜ-ⴰ ⵢⴻⵔⵏⴰ ⴰⵢⴰ ⴰⴷ ⵢⴻⴵⴵ ⵉⵎⴰⵡⵍⴰⵏ ⵏ ⵜⴽⴻⴱⴱⴰⵏⵉⵢⵉⵏ ⵜⵉⵎⴻⵥⵢⴰⵏⵉⵏ ⴰⴷ ⵙⵙⴻⵏⵣⴻⵏⵜ ⵛⵡⵉⵟ ⵙⴻⴳ ⵙⵙⴻⵍⵄⴰ-ⵏⵙⴻⵏⵜ.
