Asebter amenzawi

ANSEJ tefka tadrimt i wugar n 350.000 n tkebbaniyin timeẓyanin seg 1996

MESTɣANEM – Tanegga Taɣelnawt n Udhal n Ussemres n Yilemẓiyen (ANSEJ) tefka idrimen i ussebded n 350.000 n tkebbaniyin timeẓyanin deg wakk timnaḍin n tmurt seg wasmi ay d-tennulfa deg 1996, ɣef wakken ay d-yenna unemhal-nnes amatu ass n laṛebɛa deg Mestɣanem.

Tikebbaniyin-a snulfant-d ugar n umelyun n yimukan n uxeddim, ɣef wakken ay d-yenna Zouaoui Abdelhamid deg yijifeṛ n tmesrit (ṣalun) n tkebbanit tameẓyant ay ireẓmen deg tesdawit n Abdelhamid Ibn Badis n Mestɣanem.

Yenna-d daɣ unemhal amatu n Tnegga n ANSEJ d akken 20.000 n tkebbaniyin timeẓyanin ay d-yennulfan deg useggas n 2015 deg wakk timnaḍin n tmurt yerna snulfant-d 60.000 n yimukan n uxeddim, am wakken ay d-iwekked d akken tanegga-nnes ad ternu ad tefk tadrimt i yisenfaren ad yettekkin deg usnefli (tanmiya) d unnerni (numuw) adamsan n tmurt ɣef leḥsab n wayen teḥwaǧ yal tawilayt.

Tanegga Taɣelnawt n Udhal d Ussemres n Yilemẓiyen (ANSEJ) ad tebdu tiddit aydeg ad teg ifadden i ubdaɛ deg ussebded n tkebbaniyin, imi aya ad d-yernu lfayda i tdamsa tadigant (maḥalliyya) d tɣelnawt yerna ad d-yesnulfu imukan n uxeddim, ɣef wakken ay d-yenna unemhal amatu, am wakken ay d-iwekked d akken kra n yisenfaren yeqqnen ɣer umesni (naql) d tneɣrumt (maxbaza) ad ttwaḥebsen imi ay yeččuṛ ssuq seg-sen.

Ma d awali n Mestɣanem, Abdelwahid Temmar, iger-d tiɣri, deg tegnit-a, i yilemẓiyen akken ad bedɛen deg ussebded n tkebbaniyin, am wakken ay d-ixebber d akken « ur tettɛeḍḍil ara » ad d-tili dduṛt tamsenzit (tiǧariyya) i usmal (tarqiya) n sselɛa ay d-yettwaxdamen deg temnaḍt-a yerna aya ad yeǧǧ imawlan n tkebbaniyin timeẓyanin ad ssenzent cwiṭ seg sselɛa-nsent.