Asebter amenzawi

Yessefk ad yennerni ussexleḍ n teẓwar akken ur d-yettili ara lexṣaṣ

LEZZAYER TAMANEɣT – Yessefk ad ternu ad tesnefli (tuṭawwir) Lezzayer assexleḍ-nnes n teẓwar (ṭaqat) s usselhu n tzemmar-nnes deg teẓwar ay d-yettuɣalen akken ad tesseṛwu assuter aɣelnaw ay yezgan la irennu, ɣef wakken ay d-wekkden ass n laṛebɛa deg Lezzayer Tamaneɣt wid yettekkan deg usarag n upitṛul n lgaz deg Tefriqt n Ugafa.

Deg yiwet n tedwilt ay d-yellan ɣef yimal n temguri (ṣinaɛa) n upitṛul d lgaz deg Tefriqt n Ugafa, gren-d tamawt wid yettekkan d akken yezga la irennu ussuter n teẓwert deg Lezzayer, ladɣa win n lgaz agaman (ṭabiɛi) imi amur ameqran seg lgaz-a la yettwasseqdac i usseddu n teɣsar timeqranin n trisiti deg Lezzayer, dɣa d aya ay yesɛan lateṛ ɣef tezmert n ussiǧew n lɣella-a.

ɣef leḥsab n taddadanin (iḥṣa’iyyat), lɣella tadzayrit n trisiti la tettezzi imir-a deg 17.000 n yimigawaṭen, maca assuter la yettezzi deg 8500 n yimigawaṭen, maca assuter-a la irennu s wugar n 5%.

Afares-a (intaǧ) n trisiti yella-d s usseqdec n wugar n lgaz agaman, yili lgaz-nni tella tessefray Lezzayer ad tessiǧew, dɣa d aya ay d-yesneqsen 10 n yimelyaṛen n lmitrat tigasasin (m3) n lgaz agaman seg wanect ay tessaǧaw Lezzayer ɣer beṛṛa, yerna imir-a la tessaǧaw tmurt 44 n yimelyaṛen n lmitrat tigasasin n lgaz, amur ameqan seg-s (30 n yimelyaṛen n lmitrat tigasasin) yettwawehha i ssuq n Tuṛuft.

Seg yidis niḍen, assuder (istihlak) aɣelnaw n lgaz agaman yerna ɣer 33,7 n yimelyaṛen n yimitren igasasen deg 2014 yili deg 2013, yewweḍ kan ɣer 30 n yimelyaṛen n yimitren igasasen.