Asebter amenzawi

Talɣuɣa n Tefriqt n Uqerres Anaddal: Terbeḥ-d Lezzayer 6 n tzalɣiwin

LEZZAYER TAMANEɣT – Terbeḥ-d Lezzayer 6 n tzalɣiwin (midaliyyat) gar-asent snat n wureɣ deg telɣuɣa n Tefriqt n uqerres anaddal ay d-yellan gar 28 Nwembeṛ d 7 Dujembeṛ deg Lqahira (Maṣer).

Deg uqerres aterrasan (fardi), yerbeḥ-d Chafik Bouaoud tazalɣi n wureɣ deg umsizwer n uqerres n 10 n lmitrat s ubeckiḍ n uzwu yettwaḥeṛsen (597 n tenqiḍin) yerna d aya ay t-yeǧǧan ad iɛeddi ɣer Wuraren Ulimpiyen n Rio n 2016.

Deg uqerres n yiblaṭuten, d Abid Fouad ay yuɣalen d alɣuɣ n Tefriqt, maca yezgel s cceḥ kan aɛeddi ɣer Wuraren Ulimpiyen. Abid yerbeḥ-d kan 111 n tenqiḍin, yili agmuḍ adday i uɛeddi ɣer Wuraren Ulimpiyen yessefk ad yili 112 n tenqiḍin.

Teccetka Tfidiṛalit Tadzayrit n Uqerres Anaddal i Tfidiṛalit Tagraɣlant n Uqerres Anaddal akken ad yezmer Abid ad yettekki deg Teqbuct n Umaḍal ad d-yilin deg Meɣres n 2016 deg Qubrus akken ad yeɛreḍ ad iɛeddi ɣer Rio, ɣef wakken ay aɣ-d-yenna umaru amatu n tfidiṛalit taɣelnawt, Mohamed Miloudi.

Chaabi Houda terbeḥ-d tazalɣi n ubṛunz deg umsizwer n 10 n lmitrat s ubeckiḍ n uzwu yettwaḥeṛsen, yerna terbeḥ-d 401 n tenqiḍin.

Deg umsizwer s teɣlamin, taɣlamt tadzayrit n tlawin aydeg llant Souad Yahiaoui, Houda Chaabi d Rania Tekkerouchine, terbeḥ-d tazalɣi n uẓref (fiḍḍa) deg uqerres n 10 n lmitrat s ubeckiḍ n uzwu yettwaḥeṛsen.

Ma d taɣlamt n yirgazen aydeg llan Fouad Abid, Fouad Chabane d Ali Ben Ali Mokhtar terbeḥ-d daɣ tazalɣi n uẓref deg umsizwer n uqerres n yiblaṭuten.

Taɣlamt tadzayrit n teqcicin aydeg llant Yamina Lalouet, Medjiah Hala d Benfalami Rachida terbeḥ-d daɣ tazalɣi n ubṛunz deg umsizwer n uqerres n 10 n lmitrat s tmeẓyant n uzwu yettwaḥeṛsen.