Asebter amenzawi

Aṛekkeb n tkeṛṛusin: alug n ccuruḍ ad d-yewjed deg 2016

LEZZAYER TAMANEɣT – Aḍris (naṣṣ) n walug (daftar) n ccuruḍ ay yessefken ad yettwaqader deg uṛekkeb n tkeṛṛusin deg Lezzayer ad d-yeffeɣ deg tgara n Meɣres n 2016 ɣef wakken ay d-yenna ass n lexmis deg Lezzayer Tamaneɣt unemhal amatu n tkebbaniyin timeẓyanin d tlemmasin deg uɣlif n temguri (ṣinaɛa) d lminat, Abdelghani Mebarek.

« Aḍris-a la d-ttfakan assewjed-nnes s umɛawen gar uɣlif n temguri d yiɣlifen niḍen ay terza temsalt. Dɣa nessaram ad d-yewjed, ma aṭas, seg-a ɣer tgara n 3 n wayyuren imezwura n 2016 », ɣef wakken ay d-ixebber deg yiwen n usarag n uwekkel n lecɣal deg uṛekkeb n tkeṛṛusin timguranin ay d-iga Unmager n Yiɣfawen n Tkebbaniyin.

Tikebbaniyin tidamsanin ay iḥedṛen deg umyager-a nnant-d d akken ssarament alug-a ad yessifses ugar assefti deg unrar n tkeṛṛusin d uwekkel n lecɣal.

ɣef leḥsab-nsen, asnefli (tanmiya) n uwekkel n lecɣal yeqqen ɣer tifin n wakal aydeg ad ttwabnunt lluzinat, tukksa n tbiruqraṭit deg unrar n usseftu d ussifses n ureḍḍal n tedrimt.

Dɣa deg temsalt-a, yenna-d umazzay (xabir) n temguri yerna d aselway-anemhal amatu aqbur n SNVI, Mokhtar Chaboub d akken yessefk tikebbaniyin d unabaḍ (ḥukuma) ad mciwṛen ɣef wuguren ay sɛant tkebbaniyin n uwekkel n lecɣal yerna ad d-afen tifratin akken ad yennerni uḥric-a.

Imir-a, gar 500 d 600 n tkebbaniyin n uwekkel n lecɣal ay d-yettwaḥesben deg uḥric n temguri deg wakk timnaḍin n tmurt, ɣef leḥsab n wayen ay d-yenna unemhal n Taggazt (burṣa) Tadzayrit n Uwekkel n Lecɣal, Aziouz Laib.