Asebter amenzawi
Ajudo: Mouloud Noura d Mehdi Meskin ɛeddan ɣer Wuraren Ulimpiyen n yimeɛdaṛ
LEZZAYER TAMANEɣT – Taswiɛt-a, ala sin n yijudokaten idzayriyen, Mouloud Noura d Mehdi Meskine, ay iɛeddan ɣer Wuraren Ulimpiyen n Yimeɛdaṛ n Rio ad d-yilin deg Ctembeṛ n 2016, ɣef leḥsab n usettef n Tfidiṛalit Tagraɣlant n Waddalen n Wid Ur Yettwalin.
Mouloud Noura yusa-d d wis sin deg usettef amaḍlan n 2015 deg taggayt-nnes (ddaw 60 n yikilugṛamen) s ujemmal n 750 n tenqiḍin, yerna yewwi-d igmaḍ yelhan deg Wuraren Imaḍlanen n Seoul asegga-sa. Nnig waya, d netta ay d alɣuɣ n umaḍal deg telɣuɣa n ujudo n 2014.
Deg usettef n Tfidiṛalit tagraɣlant, Noura yezwar-it Ulbricht Namozov Sherzod (830 n tenqiḍin), ma d Adzayri ay iqerben akk ɣer-s netta d Kamal Bellabas yellan deg umkan wis 15 deg umaḍal s 230 n tenqiḍin.
Anaddal ameɛduṛ wis sin ay iɛeddan ɣer Wuraren Ulimpiyen n Yimeɛdaṛ n 2016 d Mehdi Meskine deg taggayt (fi’a) n ddaw 73 n yikilugṛamen. Meskine yewwi-d tazalɣi (midaliyya) n wureɣ deg Seoul, yerna yusa-d deg umkan wis 8 deg taggayt-nnes deg usettef n 2015 n Tfidiṛalit Tagraɣlant s 290 n tenqiḍin. Ma d Adzayri ay iqerben akk ɣer-s d Youcef Redjai yellan deg umkan wis 20 s 93 n tenqiḍin. Amkan amezwaru deg lmizan-a yeḍḍef-it Solovey Dmytro seg Ukṛanya s 1130 n tenqiḍin.
