Asebter amenzawi

195 n tmura ay iqeblen lufeq n Paris ɣef unezwu

LE BURGET – Qeblen, ass n ssebt deg tezwara n tmeddit deg Paris, yigensasen (mumattilin) n 195 n tmura amtawa (ittifaq) amaḍlan i uḥbas n ḥemmu n umaḍal ay d-yeglan s urway n unezwu (manax) d wuguren i yimdanen d ugama.

« Yettwaqbel umtawa n Paris ɣef unezwu », ɣef wakken ay d-yenna uselway n COP21, Laurent Fabius, dɣa s waya ay d-yella useffeq d ameqran deg tzeqqa-nni n temlilit. « Ta d tafḍist tameẓyant, maca tezmer ad teg tiɣawsiwin d timeqranin », ɣef wakken ay d-yenna.

« La ttwaliɣ tazeqqa-a, yerna la ttwaliɣ tasedmirt tilawt (iǧabiyya), ur sliɣ ara yella win ay yugin aya, yerna amtawa n Paris ɣef unezwu yettwaqbel! », ɣef wakken ay d-iwekked Fabius.

Sakkin, yuli-d uselway afṛensis François Hollande ɣer tṣeddart yerna yeḍḍef Ban Ki-moon d Laurent Fabius seg ufus, deg wakud aydeg tagensast n unezwu n Yiɣlanen Yeddukklen, Christiana Figueres d tnemciweṛt tafṛensist Laurence Tubiana myeḥmacent.