ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵎⴻⵙⵙⴰⵀⴻⵍ ⵉⵄⴰⵡⴻⴷ ⵉⵡⴻⴽⴽⴻⴷ-ⴷ ⴰⴷⴷⵓⴷ ⵏ ⵍⴻⵣⵣⴰⵢⴻⵔ ⵖⴻⴼ ⴼⴻⵔⵔⵓ ⴰⵙⴻⵔⵜⵉ ⴷⴻⴳ ⵍⵉⴱⵢⴰ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵏⵏⴰ-ⴷ ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ, ⴰⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵍⵎⴻⵖⵔⴻⴱ, ⴰⵙⵙ ⵏ ⵍⵃⴻⴷⴷ ⴷⴻⴳ ⵕⵓⵎⴰ, ⴷ ⴰⴽⴽⴻⵏ ⵓⵔ ⵉⴱⴻⴷⴷⴻⵍ ⴰⵔⴰ ⵡⴰⴷⴷⵓⴷ ⵏ ⵍⴻⵣⵣⴰⵢⴻⵔ ⵉ ⴼⴻⵔⵔⵓ ⵏ ⵜⴰⵍⵓⴼⵜ ⵏ ⵍⵉⴱⵢⴰ ⵙ ⵓⴱⵔⵉⴷ ⴰⵙⴻⵔⵜⵉ ⴷ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴷⴻⴳ ⵜⵎⵓⵔⵜ-ⴰ.
ⴷⴻⴳ ⵜⴳⴻⵔⵎⴰⵏⵜ-ⵏⵏⴻⵙ (ⵎⵓⴷⴰⵅⴰⵍⴰ) ⴷⴻⴳ ⵓⵙⴰⵔⴰⴳ ⴰⴳⵔⴰⵖⵍⴰⵏ ⵖⴻⴼ ⵍⵉⴱⵢⴰ, ⵢⴻⵙⵎⴻⴽⵜⵉ-ⴷ ⵎⴰⵙⵙ ⵎⴻⵙⵙⴰⵀⴻⵍ ⴷ ⴰⴽⴽⴻⵏ « ⴰⴷⴷⵓⴷ ⵏ ⵍⴻⵣⵣⴰⵢⴻⵔ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴼⴻⵔⵔⵓ ⵏ ⵜⴰⵍⵓⴼⵜ ⵏ ⵍⵉⴱⵢⴰ ⵙ ⵜⵙⴻⵔⵜⵉⵜ ⵓⵔ ⵢⴻⵜⵜⴱⴻⴷⴷⵉⵍ ⴰⵔⴰ ⵢⴻⵔⵏⴰ ⵢⴻⵜⵜⵇⴰⴷⴰⵔ ⵉⵎⴻⵏⵣⴰⵢⴻⵏ (ⵎⴰⴱⴰⴷⵉ’) ⵏ ⵜⵏⴰⵢⴰ (ⵙⵉⵢⴰⴷⴰ) ⴷ ⵓⵔⴳⴰⵍ ⵏ ⵓⴱⵔⵉⴷ ⵉ ⵜⴳⴻⵔⵎⴰⵏⵜ ⵜⴰⴱⴻⵕⵕⴰⵏⵉⵜ, ⵜⵓⵎⵎⴷⴰ ⵏ ⵡⴰⴽⴰⵍ ⴷ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⵏ ⵍⵉⴱⵢⴰ, ⴷ ⵓⵎⵙⴻⴼⵀⴰⵎ ⵏ ⵓⵖⵔⴻⴼ-ⵏⵏⴻⵙ, ⵢⴻⵔⵏⴰ ⵢⴻⵙⵙⴻⴼⴽ ⴰⴷ ⵜⴻⵙⵙⵉⵡⴻⴹ ⵜⵉⴼⵔⴰⵜ-ⴰ ⵙ ⵜⵖⴰⵡⵍⴰ ⵖⴻⵔ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ ⴰⴷ ⵢⴻⵙⵄⵓⵏ ⵜⴰⵎⴰⵏⴻⵖⵜ-ⵏⵏⴻⵙ ⴷⴻⴳ ⵟⵔⴰⴱⵍⴻⵙ ⴰⴽⴽⴻⵏ ⴰⴷ ⵢⴻⵞⵞⴰⵕ ⵢⵉⵍⴻⵎ-ⵏⵏⵉ ⴰⵙⵓⴷⴰⵏ ⵢⴻⵍⵍⴰⵏ ⴷⴻⴳ ⵍⵉⴱⵢⴰ ».
ⵉⵡⴻⴽⴽⴻⴷ-ⴷ ⵎⴰⵙⵙ ⵎⴻⵙⵙⴰⵀⴻⵍ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⴷⴷⴰ ⴷⴻⴳ ⵢⵉⵡⴻⵏ ⵏ ⵓⵍⵖⵓ (ⴱⴰⵢⴰⵏ) ⵏ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ ⴷ ⴰⴽⴽⴻⵏ « ⵔⵔⴻⴱⵔⴰⴱ ⴷ ⵜⵓⵇⵇⵏⵉⵡⵉⵏ-ⵏⵏⴻⵙ ⵜⵉⵊⵔⵉⵎⴰⵏⵉⵏ ⵍⴰ ⵜⵜⴼⴰⵕⴰⵙⴻⵏ ⵜⴰⴳⵏⵉⵜ ⵉⵎⵉ ⵓⵍⴰⵛ ⵓⵡⴰⵏⴰⴽ (ⴷⴰⵡⵍⴰ) ⴰⵢ ⵉⵣⴻⵎⵔⴻⵏ ⵉ ⵢⵉⵎⴰⵏ-ⵏⵏⴻⵙ, ⵢⴻⵊⵀⴻⴷ ⵢⴻⵔⵏⴰ ⴷ ⵓⵖⴷⵉⵎ », ⵢⴻⵔⵏⴰ ⵖⴻⴼ ⵡⴰⵢⴰ « ⴰⵢ ⴷ-ⵉⵃⴻⵜⵜⴻⵜ ⵖⴻⴼ ⵓⵙⵜⴻⵏⵢⵉ ⵏ ⵓⵎⵜⴰⵡⴰ (ⵉⵜⵜⵉⴼⴰⵇ) ⴰⵙⴻⵔⵜⵉ ⴷ ⵜⵓⵄⵊⵉⵍⵜ ⵏ ⵓⵙⵙⴻⴱⴷⴻⴷ ⵏ ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ, ⵉⵎⵉ ⴷ ⵡⴰ ⴰⵢ ⴷ ⴰⴱⵔⵉⴷ ⴰⵡⵃⵉⴷ ⴰⵢ ⵉⵣⴻⵎⵔⴻⵏ ⴰⴷ ⵉⵇⴰⴱⴻⵍ ⵉⵛⵇⵉⵔⵔⵡⴻⵏ ⵉⵙⴻⵔⵜⵉⵢⴻⵏ, ⵉⴷⴰⵎⵙⴰⵏⴻⵏ ⴷ ⵢⵉⵖⴻⵍⵍⵉⵙⴰⵏⴻⵏ (ⵏ ⵍⵉⴱⵢⴰ) ».
ⴷⵖⴰ ⵖⴻⴼ ⵡⴰⵢⴰ ⴰⵢ ⴷ-ⵉⴳⴻⵔ ⵜⵉⵖⵔⵉ ⵉ ⵡⴰⴽⴽ ⵉⵍⵉⴱⵉⵢⴻⵏ ⴰⴽⴽⴻⵏ ⴰⴷ ⵜⵜⴻⴽⴽⵉⵏ ⴷⴻⴳ « ⵜⵉⴼⵔⴰⵜ ⵜⴰⵙⴻⵔⵜⵉⵜ ⵢⴻⵔⵏⴰ ⴰⴷ ⴷ-ⵍⵀⵓⵏ ⴷ ⵓⵣⴻⴽⴽⴰ-ⵏⵙⴻⵏ ⵙ ⵓⵜⵜⵉⵅⴻⵔ ⵉ ⵡⴰⵢⴻⵏ ⴰⵢⵖⴻⴼ ⵎⴳⴻⵔⵔⴰⴷⴻⵏ ⵢⴻⵔⵏⴰ ⴰⴷ ⵙⵙⴻⵔⵙⴻⵏ ⵏⵏⴼⴻⵄ ⵏ ⵓⵖⵔⴻⴼ ⴰⵍⵉⴱⵉ ⵏⵏⵉⴳ ⴽⵓⵍⵍⴻⵛ, ⵉⵎⵉ ⴰⵙⵙⵉⵔⴻⵎ ⵏ ⵓⵖⵔⴻⴼ-ⴰ ⵏⴻⵜⵜⴰ ⴷ ⵜⴰⵎⴻⴷⴷⵓⵔⵜ ⴷⴻⴳ ⵜⴰⵍⵡⵉⵜ, ⵜⴰⵖⴻⵍⵍⵙⵉⵜ ⴷ ⵓⵔⴽⴰⴷ ».
