Asebter amenzawi
Tezmer ad d-teɣli ssuma n tnezduɣt
LEZZAYER TAMANEɣT – Ssuq uslig n tnezduɣt yenqes unnerni-nnes tagara-a ɣef lǧal n wahilen inagduden (ɛumumiyya) n tnezduɣt, ssumat ɣlayen mliḥ n tnezduɣt ay la bennun yinesmalen (muṭawwir) usligen d lateṛ n taluft tadamsant ay iḥuzan tamurt.
Taẓeyt-a deg unnerni n ssuq uslig n tnezduɣt tebda la d-tettban s ussenqes ay la ssenqasen yimawlan n tnezduɣt d yinesmalen deg ssumat n tnezduɣt, maca, seg yidis niḍen, simal la rennun wid ay la ikerrun.
Deg wayyuren-a ineggura, gren tamawt kra d akken inesmalen usligen ssuggten adellel akken ad faken assenzi n tnezduɣin-nsen timaynutin.
« Ahilen inagduden n lebni n tnezduɣt (AADL, LPP…) glan-d s lateṛ n tidet deg wayen yerzan axeddim n yinesmalen usligen », ɣef wakken ay aɣ-d-yenna yiwen n unesmal deg Wehṛan, Larbi Chemmam, yellan daɣ d aselway aqbur n Tdukli Taɣelnawt n Yinesmalen Iṣukanen.
« Ahilen-a inagduden ḥeṛsen kra n yinesmalen usligen ad sneqsen anya (watira) n uxeddim-nsen, maca yessefk daɣ ad d-nini d akken inesmalen uḍɛifen akk d inesmalen ur yeẓwiren ara deg uxeddim », ɣef wakken ay d-yenna.
Dɣa deg temsalt-a, yenna-d uselway n Tfidiṛalit Taɣelnawt n Tneggiwin Tiṣukanin (FNAI), Abdelhakim Aouidat, d akken ssumat n tnezduɣt neqsent s 10% seg wasmi ay d-yebda useggas n 2015, yerna ma tkemmel tegnit s unya-a, anqas-a yezmer ad yaweḍ ɣer gar 30 d 40% seg-a ɣef kra n wayyuren.
Anqas-a, ɣef leḥsab-nnes, d uɣal ɣer ssumat n menwala, imi ssumat n tnezduɣt wwḍent, naqal, ɣer uweziɣ yerna d aya ay yesneqsen assuter s waṭas.
«Ahilen yemgerraden n tnezduɣt ay d-yebda unabaḍ (ḥukuma) d lekra ay la kerrun waṭas n medden d ayen ay yettekkan deg unqas n ssumat n tnezduɣt », ɣef wakken ay d-yenna.
