ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⴳⴰⵔ ⵏ 3200 ⵏ ⵜⵏⴻⵣⴷⵓⵖⵉⵏ ⵏ ⵓⵅⴻⴷⴷⵉⵎ ⵉ ⵢⵉⵙⴻⵍⵎⴰⴷⴻⵏ ⵉⵙⴷⴰⵡⴰⵏⴻⵏ

ⵙⴽⵉⴽⴷⴰ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵓⵍⵎⵓⴷ ⵉⵎⵉⵏⴻⴳ (ⵄⴰⵍⵉ) ⵜⴰⵀⴰⵔ ⵀⴰⴷⵊⴰⵔ ⴰⵙⵙ ⵏ ⵍⵃⴻⴷⴷ ⴷⴻⴳ ⵙⴽⵉⴽⴷⴰ ⴷ ⴰⴽⴽⴻⵏ ⵜⵜⵡⴰⴱⵏⴰⵏⵜ 3285 ⵏ ⵜⵏⴻⵣⴷⵓⵖⵉⵏ ⵏ ⵓⵅⴻⴷⴷⵉⵎ ⵉ ⵢⵉⵙⴻⵍⵎⴰⴷⴻⵏ ⵉⵙⴷⴰⵡⴰⵏⴻⵏ ⴷⴻⴳ ⵜⴻⵎⵏⴰⴹⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⵔⵜ.

ⵜⵉⵏⴻⵣⴷⵓⵖⵉⵏ-ⴰ ⵜⵜⴳⴻⵏⵙⵉⵙⴻⵏ-ⴷ ⴰⵣⴰⵍ ⵏ 33% ⵙⴻⴳ ⵓⵊⴻⵎⵎⴰⵍ ⵏ ⵜⵏⴻⵣⴷⵓⵖⵉⵏ ⵏ ⵓⵅⴻⴷⴷⵉⵎ ⴰⵢ ⴷ-ⵎⴰⵣⴰⵍ ⴰⴷ ⵜⵜⵡⴰⴱⵏⵓⵏⵜ, ⵉⵎⵉ ⴰⵊⴻⵎⵎⴰⵍ ⵏ ⵜⵏⴻⵣⴷⵓⵖⵉⵏ-ⴰ ⴰⴷ ⵢⴰⵡⴻⴹ ⵖⴻⵔ 10.000, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ (ⵜⴰⵚⵔⵉⵃ) ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ ⴷⴻⴳ ⵢⵉⵊⵉⴼⴻⵕ ⵏ ⵢⵉⵡⴻⵜ ⵏ ⵜⴻⵣⵔⵉ ⵏ ⵓⵅⴻⴷⴷⵉⵎ ⵖⴻⴼ ⵜⵡⵉⵍⴰⵢⵜ ⵏ ⵙⴽⵉⴽⴷⴰ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ 3105 ⵏ ⵜⵏⴻⵣⴷⵓⵖⵉⵏ ⴰⵢ ⵢⴻⵜⵜⵡⴰⴼⴻⵔⵇⴻⵏ ⴰⵔ ⴰⵙⵙ-ⴰ ⵖⴻⴼ ⵢⵉⵙⴻⵍⵎⴰⴷⴻⵏ ⵉⵙⴷⴰⵡⴰⵏⴻⵏ.

ⵉⵡⴻⴽⴽⴻⴷ-ⴷ ⵓⵏⴻⵖⵍⴰⴼ ⴷ ⴰⴽⴽⴻⵏ 2000 ⵙⴻⴳ ⵜⵏⴻⵣⴷⵓⵖⵉⵏ ⴰⵢ ⴷ-ⵢⴻⵜⵜⴻⴷⴷⵓⵏ ⴰⵜⴻⵏⵜⵉ ⵡⴻⵊⴷⴻⵏⵜ ⵙ 50%, ⵢⴻⵔⵏⴰ ⵉⵅⴻⴱⴱⴻⵔ-ⴷ ⴷ ⴰⴽⴽⴻⵏ 1794 ⵙⴻⴳ ⵜⵏⴻⵣⴷⵓⵖⵉⵏ-ⴰ ⴰⵜⴻⵏⵜⵉ ⴷⴻⴳ 21 ⵏ ⵜⵡⵉⵍⴰⵢⵉⵏ ⵖⴻⴼ ⵍⴻⵃⵙⴰⴱ ⵏ ⵓⵎⵙⴻⴼⵀⴰⵎ ⴰⵢ ⴷ-ⵢⴻⵍⵍⴰⵏ ⴳⴰⵔ ⵓⵖⵍⵉⴼ ⵏ ⵓⵍⵎⵓⴷ ⵉⵎⵉⵏⴻⴳ ⴷ ⵓⵖⵍⵉⴼ ⵏ ⵜⵏⴻⵣⴷⵓⵖⵜ.

ⵢⴻⵏⵏⴰ-ⴷ ⴷⴰⵖ ⴷ ⴰⴽⴽⴻⵏ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⵢⴻⵍⵍⴰ ⵓⵙⴻⵏⴼⴰⵔ ⵏ ⵍⴻⴱⵏⵉ ⵏ 650 ⵏ ⵜⵏⴻⵣⴷⵓⵖⵉⵏ ⵢⴻⵔⵏⴰ ⴰⴷ ⵢⴻⴱⴷⵓ ⵓⵙⴻⵏⴼⴰⵔ-ⴰ « ⴰⴽⴽⴻⵏ ⴽⴰⵏ ⴰⴷ ⵢⴻⴼⵔⵓ ⵡⵓⴳⵓⵔ ⵏ ⵜⵉⴼⵉⵏ ⵏ ⵡⴰⴽⴰⵍ ». ⵙⴻⴳ ⵢⵉⴷⵉⵙ ⵏⵉⴹⴻⵏ, ⵉⵅⴻⴱⴱⴻⵔ-ⴷ ⴷ ⴰⴽⴽⴻⵏ ⵜⴻⵜⵜⵓⵏⴻⴼⴽ ⵍⴻⵡⵚⴰⵢⴰ ⵉ ⵢⵉⵙⴻⵍⵡⴰⵢⴻⵏ ⵏ ⵜⴻⵙⴷⴰⵡⵉⵢⵉⵏ ⴰⴽⴽⴻⵏ ⴰⴷ ⴼⴽⴻⵏ « ⵜⵉⵏⴰⴳⵉⵡⵉⵏ ⵏ ⵜⵓⴽⵛⵉ ⵏ ⵜⵏⴻⵣⴷⵓⵖⵜ » ⵉ ⵢⵉⵙⴻⵍⵎⴰⴷⴻⵏ ⴰⵢ ⴷ-ⵢⴻⵙⴼⴰⵢⴷⵉⵏ ⵙⴻⴳ-ⵙⴻⵏⵜ ⵎⵉ ⵢⴰⵡⴻⴹ ⵍⴻⴱⵏⵉ ⵏ ⵜⵏⴻⵣⴷⵓⵖⵉⵏ-ⴰ ⵖⴻⵔ 40%.

ⴷⴻⴳ ⵜⵓⵣⵣⵢⴰ-ⵏⵏⴻⵙ ⵖⴻⴼ ⵜⵡⵉⵍⴰⵢⵜ ⵏ ⵙⴽⵉⴽⴷⴰ, ⵢⴻⵙⵙⴻⴼⵇⴻⴷ ⵎⴰⵙⵙ ⵀⴰⴷⵊⴰⵔ ⵢⵉⵡⴻⵏ ⵏ ⵓⵙⴻⵏⴼⴰⵔ ⵏ ⵍⴻⴱⵏⵉ ⵏ ⵜⵏⴻⵣⴷⵓⵖⵜ ⵏ ⵓⵅⴻⴷⴷⵉⵎ ⵙⴷⴰⵜ ⵜⴻⵙⴷⴰⵡⵉⵜ ⵏ 20 Ɣⵓⵛⵜ 1955. ⴰⵙⴻⵏⴼⴰⵔ-ⴰ ⴰⴷ ⵉⵍⵉⵏⵜ ⴷⴻⴳ-ⵙ 220 ⵏ ⵜⵏⴻⵣⴷⵓⵖⵉⵏ ⵏ ⵓⵅⴻⴷⴷⵉⵎ ⵢⴻⵔⵏⴰ ⴰⴷ ⴷ-ⵡⴻⵊⴷⴻⵏⵜ ⴷⴻⴳ ⵜⴳⴰⵔⴰ ⵏ 2016.