Asebter amenzawi

Ugar n 3200 n tnezduɣin n uxeddim i yiselmaden isdawanen

SKIKDA – Yenna-d uneɣlaf n ulmud imineg (ɛali) Tahar Hadjar ass n lḥedd deg Skikda d akken ttwabnant 3285 n tnezduɣin n uxeddim i yiselmaden isdawanen deg temnaḍin yemgerraden n tmurt.

Tinezduɣin-a ttgensisen-d azal n 33% seg ujemmal n tnezduɣin n uxeddim ay d-mazal ad ttwabnunt, imi ajemmal n tnezduɣin-a ad yaweḍ ɣer 10.000, ɣef wakken ay d-yenna uneɣlaf deg yiwet n tseɣrut (taṣriḥ) i Tnegga n Yisalan n Lezzayer deg yijifeṛ n yiwet n tezri n uxeddim ɣef twilayt n Skikda, yerna yenna-d d akken 3105 n tnezduɣin ay yettwaferqen ar ass-a ɣef yiselmaden isdawanen.

Iwekked-d uneɣlaf d akken 2000 seg tnezduɣin ay d-yetteddun atenti wejdent s 50%, yerna ixebber-d d akken 1794 seg tnezduɣin-a atenti deg 21 n twilayin ɣef leḥsab n umsefham ay d-yellan gar uɣlif n ulmud imineg d uɣlif n tnezduɣt.

Yenna-d daɣ d akken deg Lezzayer Tamaneɣt yella usenfar n lebni n 650 n tnezduɣin yerna ad yebdu usenfar-a « akken kan ad yefru wugur n tifin n wakal ». Seg yidis niḍen, ixebber-d d akken tettunefk lewṣaya i yiselwayen n tesdawiyin akken ad fken « tinagiwin n tukci n tnezduɣt » i yiselmaden ay d-yesfaydin seg-sent mi yaweḍ lebni n tnezduɣin-a ɣer 40%.

Deg tuzzya-nnes ɣef twilayt n Skikda, yessefqed Mass Hadjar yiwen n usenfar n lebni n tnezduɣt n uxeddim sdat tesdawit n 20 Ɣuct 1955. Asenfar-a ad ilint deg-s 220 n tnezduɣin n uxeddim yerna ad d-wejdent deg tgara n 2016.