Asebter amenzawi

Yessefk ad stenyin Yilibiyen lufeq aserti ass n 16 Dujembeṛ

LEZZAYER TAMANEɣT – Aṭas n tmura d tuddsiwin (munaḍḍamat) tigraɣlanin ay d-yegren tiɣri i yidisan ilibiyen akken ad stenyin war leɛḍil amtawa aserti ay d-yellan ddaw leɛnaya n Yiɣlanen Yeddukklen, yerna yessefk ad d-sbedden anabaḍ (ḥukuma) n tdukli taɣelnawt akken ad faken taluft ay yefkan axeṣṣar i Libya seg tgara n 2011.

Tekka-d teɣri-a ass n lḥedd seg Ṛuma, tamaneɣt n Ṭṭalyan, mi ifuk usarag agraɣlan ɣef Libya, ay d-yellan ddaw tselwit n uneɣlaf aṭalyani n tɣawsiwin n uzɣar, Paolo Gentiloni, d umaru n uwanak amarikani, John Kerry.

Deg yiwen n ulɣu (bayan) ucrik, nnan-d yimttekkiyen deg usarag-nni d akken anabaḍ n tdukli taɣelnawt ad yesɛun tamaneɣt-nnes deg Ṭrables « yessefk ad yili akken ad iqabel, s ticcurka d umɣiwan agraɣlan, uguren imeqranen ay yerzan tamurt-a » seg yidisan aserti, aɣellisan (amni) d walsan (insani).

S waya, amɣiwan (muǧtamaɛ) agraɣlan iger-d tiɣri, deg usarag n Ṛuma, « i wakk idisan ay terza temsalt akken ad qeblen aḥbas n yimenɣi ummid war leɛḍil yerna deg wakk timnaḍin n Libya », am wakken ay iɛawed iwekked-d aɛewwel-nnes akken ad d-yefk akk lemɛawna talsant ay ḥwaǧen yimezdaɣen n Libya.

Lezzayer yeḥdeṛ s yisem-nnes uneɣlaf n tɣawsiwin n Lmeɣreb, Abdelkader Messahel, ay iɛawden iwekked-d abdad n Lezzayer ur yettbeddilen ara deg wayen yerzan ferru aserti n taluft talibit s ussebded n unabaḍ n tdukli taɣelnawt s uqader n umtawa aserti ay d-yellan ddaw leɛnaya n Yiɣlanen Yeddukklen.