ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵉⴳⴻⵔ-ⴷ ⵜⵉⵖⵔⵉ ⵎⴻⵙⵙⴰⵀⴻⵍ ⵉ ⵓⵙⵙⴻⴵⵀⴻⴷ ⵏ ⵓⵎⵄⴰⵡⴻⵏ ⴰⴷⴰⵎⵙⴰⵏ ⴷ ⵉⵕⴰⵏ
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵉⴳⴻⵔ-ⴷ ⵓⵏⴻⵖⵍⴰⴼ ⵏ ⵜⵖⴰⵡⵙⵉⵡⵉⵏ ⵏ ⵍⵎⴻⵖⵔⴻⴱ, ⴰⴱⴷⴻⵍⴽⴰⴷⴻⵔ ⵎⴻⵙⵙⴰⵀⴻⵍ, ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵍⴻⵣⵣⴰⵢⴻⵔ, ⵜⵉⵖⵔⵉ ⵉ ⵓⵙⵙⴻⴵⵀⴻⴷ ⵏ ⵓⵎⵄⴰⵡⴻⵏ ⴰⴷⴰⵎⵙⴰⵏ ⴳⴰⵔ ⵍⴻⵣⵣⴰⵢⴻⵔ ⴷ ⵉⵕⴰⵏ.
ⴷⴻⴳ ⵢⵉⵡⴻⵜ ⵏ ⵜⵉⵏⴰⵡⵜ (ⴽⴰⵍⵉⵎⴰ) ⴰⵢ ⴷ-ⵢⴻⵖⵔⴰ ⴷⴻⴳ ⵜⴻⵎⵍⵉⵍⵉⵜ ⵏ ⵓⵙⴻⵇⵇⴰⵎⵓ ⵏ ⵓⴹⴼⴰⵔ ⴰⴷⵣⴰⵢⵔⵉ-ⵉⵕⴰⵏⵉ, ⴰⵢ ⵢⴻⵎⵍⴰⵍⴻⵏ ⵉ ⵓⵀⴻⵢⵢⵉ ⵏ ⵜⴻⴷⵡⵉⵍⵜ ⵜⵉⵙ 2 ⵏ ⵜⵙⴻⵇⵇⴰⵎⵓⵜ ⵜⵓⵏⵏⵉⴳⵜ ⵜⵓⵅⵍⵉⴹⵜ ⵜⴰⴷⵣⴰⵢⵔⵉⵜ-ⵜⵉⵕⴰⵏⵉⵜ, ⵢⴻⵏⵏⴰ-ⴷ ⵎⴰⵙⵙ ⵎⴻⵙⵙⴰⵀⴻⵍ ⴷ ⴰⴽⴽⴻⵏ « ⴰⵙⵙⴰⵖⴻⵏ-ⴰ ⵢⴻⵜⵜⵉⵍⵉ-ⴷ ⴷⴻⴳ-ⵙⴻⵏ ⵓⵎⵛⵉⵡⴻⵕ ⵢⴻⵜⵜⴽⴻⵎⵎⵉⵍⴻⵏ » ⴳⴰⵔ ⵢⵉⵎⴹⴻⴱⴱⵔⴻⵏ ⵓⵏⵏⵉⴳⴻⵏ ⵏ ⵍⴻⵣⵣⴰⵢⴻⵔ ⴷ ⵉⵕⴰⵏ ⵖⴻⴼ ⵓⵙⵙⴻⴵⵀⴻⴷ ⵏ ⵡⴰⵙⵙⴰⵖⴻⵏ ⵓⵛⵔⵉⴽⴻⵏ ⴷⴻⴳ ⵢⵉⵏⵓⵔⴰⵔ ⵢⴻⵎⴳⴻⵔⵔⴰⴷⴻⵏ.
ⴰⵙⵙⴰⵖⴻⵏ-ⴰ ⵓⴼⵔⴰⵔⴻⵏ-ⴷ ⴷⴰⵖ ⵙ ⵜⴻⵔⵣⴰ ⵜⵓⵏⵚⵉⴱⵉⵏ ⴷ ⵜⵉⴷ ⵏ ⵓⵅⴻⴷⴷⵉⵎ ⴰⵢ ⵉⴳⴰⵏ ⴰⵙⵓⵔⵉⴼ ⵢⴻⵍⵀⴰⵏ ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⵍⵍⴰ ⵜⴻⴷⵡⵉⵍⵜ ⵜⴰⵎⴻⵣⵡⴰⵔⵓⵜ ⵏ ⵜⵙⴻⵇⵇⴰⵎⵓⵜ ⵜⵓⵏⵏⵉⴳⵜ ⵜⵓⵅⵍⵉⴹⵜ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ ⴷⴻⴳ ⵏⵡⴻⵎⴱⴻⵕ ⵏ 2012.
« ⵜⴰⴷⴰⵎⵙⴰ, ⴰⵎⴱⴰⴷⴷⴻⵍ ⴰⵎⵙⴻⵏⵣⵉ (ⵜⵉⴵⴰⵔⵉ) ⴷ ⵓⵙⵙⴻⴼⵜⵉ ⵎⴰⵣⴰⵍ, ⵖⴻⴼ ⵍⴻⵃⵙⴰⴱ-ⵉⵏⵓ, ⵢⴻⵙⵙⴻⴼⴽ ⴰⴷ ⵏⵏⴻⵔⵏⵉⵏ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ ⴰⵢ ⵢⴻⵙⵄⴰⵏ ⵜⵉⵣⴻⵎⵎⴰⵔ ⴷ ⵜⵜⴰⵡⵉⵍⴰⵜ ⴰⵢⵢⴻⵙ ⴰⴷ ⵙⵏⴻⵔⵏⵉⵏⵜ ⴰⵢⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵎⴻⵙⵙⴰⵀⴻⵍ ⴰⵢ ⵢⴻⵙⵃⴰⵙⵙⴼⴻⵏ ⵉⵎⵉ ⵓⵔ ⴳⴳⵉⵜⴻⵏⵜ ⴰⵔⴰ ⵜⴽⴻⴱⴱⴰⵏⵉⵢⵉⵏ ⵜⵉⵕⴰⵏⵉⵢⵉⵏ ⴰⵢ ⵉⵅⴻⴷⴷⵎⴻⵏ ⴷⴻⴳ ⵍⴻⵣⵣⴰⵢⴻⵔ.
ⴷⵖⴰ ⵢⴻⵏⵏⴰ-ⴷ, ⴷⴻⴳ ⵜⴻⵎⵙⴰⵍⵜ-ⴰ, ⵎⴰⵙⵙ ⵎⴻⵙⵙⴰⵀⴻⵍ ⴷ ⴰⴽⴽⴻⵏ ⵍⴰ ⵢⴻⵙⵙⴰⵔⴰⵎ ⴰⴷ ⵜⵉⵍⵉ ⵜⴻⴷⵡⵉⵍⵜ-ⴰ ⵜⵉⵙ ⵙⵏⴰⵜ ⵏ ⵜⵙⴻⵇⵇⴰⵎⵓⵜ ⵜⵓⵏⵏⵉⴳⵜ ⴷ « ⵜⴰⴳⵏⵉⵜ ⵉ ⵓⵇⴻⵢⵢⴻⵎ ⴰⵎⴰⵜⵓ ⴷ ⵓⵍⵇⴰⵢⴰⵏ ⵏ ⵓⵎⵄⴰⵡⴻⵏ ⴳⴰⵔ ⵙⵏⴰⵜ-ⴰ ⵏ ⵜⵎⵓⵔⴰ ⴷ ⵓⵙⵙⵓⴽⴽⵓ ⵏ ⵜⵉⵟ ⵖⴻⴼ ⵙⵙⴻⴱⴱⴰⵜ ⵏ ⵍⴻⵅⵚⴰⵚ ⵏ ⵓⵎⵄⴰⵡⴻⵏ ⴰⴷⴰⵎⵙⴰⵏ ⵉ ⵍⵎⴻⵏⴷ ⵏ ⵜⵉⴼⵉⵏ ⵏ ⵜⵜⴰⵡⵉⵍⴰⵜ ⴰⴷ ⵢⴻⵙⴵⴻⵀⴷⴻⵏ ⵢⴻⵔⵏⴰ ⴰⴷ ⵙⵏⴻⴼⵍⵉⵏ (ⵜⵓⵏⴰⵎⵎⵉ) ⴰⵙⵙⴰⵖⴻⵏ ⵉⴷⴰⵎⵙⴰⵏⴻⵏ ⵓⵛⵔⵉⴽⴻⵏ », ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵛⴽⴻⵕ « ⴰⵙⵙⵓⴷⴷⴻⵙ ⵏ ⵓⵏⵎⴰⴳⴻⵔ (ⵎⵓⵏⵜⴰⴷⴰ) ⵏ ⵢⵉⵔⴳⴰⵣⴻⵏ ⵏ ⵢⵉⵡⴻⵥⵍⴰ ⵏ ⵙⵏⴰⵜ-ⴰ ⵏ ⵜⵎⵓⵔⴰ ⴷⴻⴳ ⵢⵉⵊⵉⴼⴻⵕ ⵏ ⵜⴻⵎⵍⵉⵍⵉⵢⵉⵏ ⵏ ⵜⵙⴻⵇⵇⴰⵎⵓⵜ ⵜⵓⵏⵏⵉⴳⵜ ⵜⵓⵅⵍⵉⴹⵜ ».
