Asebter amenzawi

Iger-d tiɣri Messahel i usseǧhed n umɛawen adamsan d Iṛan

LEZZAYER TAMANEɣT – Iger-d uneɣlaf n tɣawsiwin n Lmeɣreb, Abdelkader Messahel, ass n ttlata deg Lezzayer, tiɣri i usseǧhed n umɛawen adamsan gar Lezzayer d Iṛan.

Deg yiwet n tinawt (kalima) ay d-yeɣra deg temlilit n Useqqamu n Uḍfar Adzayri-Iṛani, ay yemlalen i uheyyi n tedwilt tis 2 n Tseqqamut Tunnigt Tuxliḍt Tadzayrit-Tiṛanit, yenna-d Mass Messahel d akken « assaɣen-a yettili-d deg-sen umciweṛ yettkemmilen » gar yimḍebbren unnigen n Lezzayer d Iṛan ɣef usseǧhed n wassaɣen ucriken deg yinurar yemgerraden.

Assaɣen-a ufraren-d daɣ s terza tunṣibin d tid n uxeddim ay igan asurif yelhan seg wasmi ay d-tella tedwilt tamezwarut n Tseqqamut Tunnigt Tuxliḍt gar snat-a n tmura deg Nwembeṛ n 2012.

« Tadamsa, ambaddel amsenzi (tiǧari) d ussefti mazal, ɣef leḥsab-inu, yessefk ad nnernin gar snat-a n tmura ay yesɛan tizemmar d ttawilat ayyes ad snernint aya », ɣef wakken ay d-yenna Mass Messahel ay yesḥassfen imi ur ggitent ara tkebbaniyin tiṛaniyin ay ixeddmen deg Lezzayer.

Dɣa yenna-d, deg temsalt-a, Mass Messahel d akken la yessaram ad tili tedwilt-a tis snat n Tseqqamut Tunnigt d « tagnit i uqeyyem amatu d ulqayan n umɛawen gar snat-a n tmura d ussukku n tiṭ ɣef ssebbat n lexṣaṣ n umɛawen adamsan i lmend n tifin n ttawilat ad yesǧehden yerna ad sneflin (tunammi) assaɣen idamsanen ucriken », am wakken ay d-yeckeṛ « assuddes n unmager (muntada) n yirgazen n yiweẓla n snat-a n tmura deg yijifeṛ n temliliyin n Tseqqamut Tunnigt Tuxliḍt ».