ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴰⵍⵓⴼⵜ ⵏ ⴱⵓⵔⵓⵏⴷⵉ: ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⵜⴳⴻⵔ-ⴷ ⵜⵉⵖⵔⵉ ⵉ ⴱⴻⴷⴷⵓ ⵏ ⵍⴻⵎⵛⴰⵡⵕⴰⵜ
ⴰⴷⴷⵉⵙ ⴰⴱⴻⴱⴰ – ⵜⴻⵏⵏⴰ-ⴷ ⵜⴷⵓⴽⵍⵉ ⵜⴰⴼⵔⵉⵇⵉⵜ ⴷ ⴰⴽⴽⴻⵏ ⵜⴻⵛⵖⴻⴱ-ⵉⵜⵜ ⵎⵍⵉⵃ ⵜⴻⴳⵏⵉⵜ ⵏ ⴱⵓⵔⵓⵏⴷⵉ ⵢⴻⵔⵏⴰ ⵜⴳⴻⵔ-ⴷ ⵜⵉⵖⵔⵉ ⵉ ⵢⵉⴱⵓⵔⵓⵏⴷⵉⵢⴻⵏ ⴰⴽⴽⴻⵏ ⴰⴷ ⴷ-ⴱⴷⵓⵏ ⵍⴻⵎⵛⴰⵡⵕⴰⵜ ⴰⵢⴷⴻⴳ ⴰⴷ ⵜⵜⴻⴽⴽⵉⵏ ⴰⴽⴽ ⵢⵉⴷⵉⵙⴰⵏ ⴰⴽⴽⴻⵏ ⴰⴷ ⴼⵔⵓⵏ ⵜⴰⵍⵓⴼⵜ ⵏ ⵡⴰⵙⵙ-ⴰ.
ⵖⴻⴼ ⵍⴻⵃⵙⴰⴱ ⵏ ⵢⵉⵡⴻⵜ ⵏ ⵜⵙⴻⵖⵔⵓⵜ (ⵜⴰⵚⵔⵉⵃ) ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ ⴰⵢ ⴷ-ⵢⴻⴼⴼⵖⴻⵏ ⴰⵙⵙ ⵏ ⵍⵃⴻⴷⴷ, ⵜⴻⵏⵏⴰ-ⴷ ⵜⵙⴻⵍⵡⴰⵢⵜ ⵏ ⵜⵙⴻⵇⵇⴰⵎⵓⵜ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ, ⵏⴽⵧⵙⴰⵣⴰⵏⴰ ⴷⵍⴰⵎⵉⵏⵉ-ⵣⵓⵎⴰ, ⴷ ⴰⴽⴽⴻⵏ ⵜⴻⵛⵖⴻⴱ-ⵉⵜⵜ ⵎⵍⵉⵃ ⵜⴻⵎⵙⴰⵍⵜ ⵏ ⵜⵎⴻⵔⵏⵉⵡⵜ ⵏ ⵛⵛⵡⴰⵍ ⴷⴻⴳ ⴱⵓⵔⵓⵏⴷⵉ ⵢⴻⵔⵏⴰ ⵉⴱⴰⵏ-ⴷ ⵡⴰⵢⴰ ⵙ ⵜⴻⵏⵟⴰⴳⵉⵏ (ⵀⵓⴵⵓⵎⴰⵜ) ⵏ 11 ⴷⵓⵊⴻⵎⴱⴻⵕ ⵎⴳⴰⵍ ⵢⵉⵎⴰⵣⵉⵔⴻⵏ ⵉⵙⴻⵔⴷⴰⵙⴰⵏⴻⵏ ⴷⴻⴳ ⴱⵓⵊⵓⵎⴱⵓⵔⴰ ⴷ ⵜⴻⵎⵏⴰⴹⵉⵏ ⴰⵢ ⴷ-ⵢⴻⵣⵣⵉⵏ ⴼⴻⵍⵍ-ⴰⵙ.
ⵙⴻⴳ ⵢⵉⴷⵉⵙ ⵏⵉⴹⴻⵏ, ⵜⵄⴰⵡⴻⴷ ⵜⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⵜⵓⴳⵉ ⴰⵙⵙⴻⵇⴷⴻⵛ ⵏ ⵜⴻⴽⵔⵉⴹⵜ (ⵄⵓⵏⴼ) ⴰⵎ ⵡⴰⴽⴽⴻⵏ ⴰⵢ ⴷ-ⵜⵡⴻⵜ ⵙ ⵍⴵⴻⵀⴷ ⴷⴻⴳ ⵓⵔⴽⴰⴹ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ.
ⵜⴻⵏⵏⴰ-ⴷ ⴷⴰⵖ, ⵎⴰⵙⵙⴰ ⴷⵍⴰⵎⵉⵏⵉ-ⵣⵓⵎⴰ, ⴷ ⴰⴽⴽⴻⵏ ⵜⴻⵙⵃⴰⵙⵙⴻⴼ ⵢⴻⵔⵏⴰ ⵜⴻⵅⵍⴻⵄ ⵖⴻⴼ ⵜⵎⴻⵜⵜⴰⵏⵜ ⵏ ⵡⴰⵟⴰⵙ ⵏ ⵎⴻⴷⴷⴻⵏ ⴷⴻⴳ ⵛⵛⵡⴰⵍ-ⴰ, ⵢⴻⵔⵏⴰ ⴽⵔⴰ ⵙⴻⴳ ⵎⴻⴷⴷⴻⵏ ⵢⴻⵎⵎⵓⵜⴻⵏ ⵜⵜⵡⴻⵏⵖⴻⵏ ⴷⴻⴳ ⵍⴱⴰⵟⴻⵍ.
ⵜⴻⵏⵏⴰ-ⴷ ⴷⴰⵖ ⴷ ⴰⴽⴽⴻⵏ ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⵍⴰ ⵜⵅⴻⴷⴷⴻⵎ ⴷ ⵓⵎⵖⵉⵡⴰⵏ (ⵎⵓⴵⵜⴰⵎⴰⵄ) ⴰⴳⵔⴰⵖⵍⴰⵏ ⵢⴻⵔⵏⴰ ⴰⴷ ⵜⴻⴳ ⴰⴽⴽ ⴰⵢⴻⵏ ⵓⵎⵉ ⵜⴻⵣⵎⴻⵔ ⴰⴽⴽⴻⵏ ⵡⵉⴷ ⴰⵢ ⵉⴳⴰⵏ ⵜⵉⵖⴰⵡⵙⵉⵡⵉⵏ-ⴰ ⵢⴻⵙⵙⴻⵡⵃⴰⵛⴻⵏ ⴷ ⵡⵉⴷ ⵢⴻⵍⵍⴰⵏ ⴷⴻⴼⴼⵉⵔ-ⵏⵙⴻⵏ ⴰⴷ ⵜⵜⵡⴰⵃⴰⵙⴱⴻⵏ.
ⵜⵡⴻⴽⴽⴻⴷ-ⴷ ⵎⴰⵙⵙⴰ ⴷⵍⴰⵎⵉⵏⵉ-ⵣⵓⵎⴰ ⴷ ⴰⴽⴽⴻⵏ ⵛⵛⵡⴰⵍ-ⴰ ⵢⴻⵣⵎⴻⵔ ⴰⴷ ⵢⴻⵣⵔⴻⵄ ⴷⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵏ ⴱⵓⵔⵓⵏⴷⵉ ⵢⴻⵔⵏⴰ ⵢⴻⵣⵎⴻⵔ ⴰⴷ ⴷ-ⵢⴻⴳⵍⵓ ⵙ ⵍⴰⵜⴻⵕ ⴷ ⴰⵎⴻⵇⵔⴰⵏ ⴰⵎⴰ ⵖⴻⴼ ⵜⵎⵓⵔⵜ-ⴰ, ⴰⵎⴰ ⵖⴻⴼ ⵜⵎⵓⵔⴰ ⵏ ⵜⴻⵎⵏⴰⴹⵜ.
