Asebter amenzawi

Tafriqt tezmer ad d-tettekki deg usseɛjel n tifrat deg Libya (Chergui)

LEZZAYER TAMANEɣT – Yenna-d Yimwekkel i Talwit d Tɣellist n Tdukli Tafriqit, Smail Chergui, ass n ttlata deg Lezzayer Tamaneɣt, d akken Tafriqt « tezmer ad d-tettekki s waṭas deg usseɛjel » n tifrat tasertit deg taluft ay icewwlen Libya seg tgara n 2011.

« Ttwaliɣ d akken Tafriqt tezmer ad d-tettekki s waṭas deg usseǰel n tifrat » n taluft talibit, ɣef wakken ay d-yenna Mass Chergui yellan d inebgi deg Terga tis 3 n ṛṛadyu n Lezzayer.

« Libya attan, ass-a, d tamurt anda ay yessefk ad ddukklen akk wussisen (maǧhudat) akken ad yili umtawa (ittifaq) aserti gar wid ay terza temsalt akken ad xedmen i lmend n lebni n yigen (ǧayc) aɣelnaw yerna ad frun s tidet tamsalt n rrebrab », ɣef wakken ay d-yenna udiplumati-a adzayri.

Yebder-d daɣ Mass Chergui daɣ d akken Lezzayer tɛeyyen-d d akken ur yessefk ara ad d-tili tgermant (tadaxxul) taserdasit deg Libya acku ma yella-d waya, yezmer ad d-yeglu s yixeṣṣaren ɣef temnaḍt-a.

Tasnagt (ḥikma) ay yesmenyafen « tifrat tasertit ɣef tigawt timselleḥt deg Libya yessefk daɣ ad d-tettwawekked acku tifrat timselleḥt ass-a deg Libya ad ternu kan ad terwi tagnit yerna ad ternu ad tessebɛed ugar iswi-nni n umsuɣal gar waytmaten-nneɣ ilibiyen », ɣef wakken ay d-iɛeyyen.

Libya tezder deg urway seg wasmi ay yeɣli unhil (niḍam) aqbur n Maamar El-Gueddafi deg tgara n 2011, yerna ass-a tamurt-a tesɛa sin n yiduba isertiyen ay la yettnaɣen ɣef leḥkem. Yiwen seg-sen atan deg Ṭrables, ma d wayeḍ (win ayyes steɛṛfen leǧnas) atan deg Ṭubruq, deg ugmuḍ n tmurt.