Asebter amenzawi

Yessers Bedoui tameqqunt n yijeǧǧigen d tajmilt i wid yemmuten deg Tubeṛ n 1961

PARIS – Yessers uneɣlaf n tɣawsiwin n daxel, Noureddine Bedoui, ass n laṛebɛa deg Saint-Denis, tameqqunt n yijeǧǧigen d tajmilt i Yidzayriyen yemmuten deg tnegzarin (maǧazir) n 17 Tubeṛ 1961 n Paris d temnaḍt-nnes.

Mass Bedoui yebded tadqiqt n tsusmi sdat tmenzit (naṣb tidkari) n Fatima Bedar, deg Bobigny, d tameṭṭut ay yettwenɣen deg tnegzarin-nni tuqriḥin ay d-yellan kra kan n wayyuren uqbel uzarug (istiqlal) n Lezzayer.

Ttawilat n yisalan ifṛensisen nnan-d d akken tadyant-a d « yiwet seg tnegzarin timeqranin akk ay d-yellan mgal yimdanen n menwala deg umezruy amiran n Tuṛuft ».

D timerwin n yigiman (alaf) n Yidzayriyen ay yettekkan deg tmesbaniyin timelwiyin mgal agdal n tuffɣa ay d-yettwaxedmen ɣef lǧal-nsen seg wass n 5 Tubeṛ 1961 d umḥaq ay ten-yemḥeq yimḍebber n temsulta (curṭa) n Seine, Maurice Papon. Maca tamesbanit-a tfuk s tnegzart aydeg d igiman n Yidzayriyen ay yettwenɣen yerna kra seg-sen ttwaḍeyyren ɣer wasif n Seine.

Deg tfugla-a, yeḥdeṛ gma-s n tmeṛḥumt-nni yerna yenna-d d akken « d iseɣ ameqran i nekkni akk imi ay nemmuger, i tikkelt tamezwarut, aneɣlaf tegduda tadzayrit ay d-yusan ad yessiweḍ ṛṛeḥma i Fatima Bedar deg wurti-a ay teqbel tɣiwant, ass n 17 Tubeṛ, ad as-tefk isem n tmeṛḥumt ».

« Ta d tigawt yesɛan azal d ameqran sɣur unabaḍ (ḥukuma) adzayri d tɣiwant n Saint-Denis ay iqeblen ad terr tajmilt i weltma d wakk wid ay yeɣlin deg Tubeṛ n 1961 deg Paris d temnaḍt-nnes », ɣef wakken ay d-yenna.