Asebter amenzawi

Assebded n tkebbaniyin tuxliḍin gar Lezzayer d Iṛan deg lebni n yibriden

LEZZAYER TAMANEɣT – Lezzayer d Iṛan bɣant ad d-sbeddent tikebbaniyin tuxliḍin deg uṣeggem, taɛessast d ussefqed n yibriden d yibriden imazzalen, ɣef wakken ay d-yenna ass n laṛebɛa deg Lezzayer Tamaneɣt uneɣlaf n yimahilen inagduden (acɣal ɛumumiyya), Abdelkader Ouali.

Mi ifuk adiwenni-nnes d uneɣlaf iṛani n yibriden, Abbas Akhondi, yenna-d Mass Ouali i tɣemsa d akken Lezzayer tebɣa ad d-tfaṛes seg ttejṛiba tiṛanit deg unrr-a s ussebded n tkebbaniyin tuxliḍin.

Aneɣlaf-a iṛani yusa-d deg terzi n sin n wussan ɣef Lezzayer ɣer yidis n unmazul (na’ib) n uselway iṛani, d tirzi aydeg ad temlil daɣ Tseqqamut Tunnigt Txuliḍt gar Lezzayer d Iṛan.

« Lezzayer tebna ugar n 23.000 n yikilumitren n yibriden imazzalen. Ayen ay nebɣa seg Yiṛaniyen netta d asnefli (taṭwir) n ttawilat n uṣeggem d tɛessast taliktṛunant n yibriden », ɣef wakken ay d-yenna Mass Ouali.

Yerna yenna-d d akken tikebbaniyin-a ad d-ttwasbeddent s uqader n ulugen-nni n 51/49 n ṛaselmal yerzan assefti abeṛṛani deg Lezzayer.

« Ad nebdu, deg Yennayer ay d-yetteddun, aheyyi n wahil amaynu i ussefɛel n umɛawen-a ucrik d usseǧhed-nnes », ɣef wakken ay d-yerna uneɣlaf ay d-iṛeggmen i umtil-nnes iṛani d akken d netta s timmad-nnes ad iḍefren ticcurkiwin-a akken ad rebḥent.

Ma d aneɣlaf iṛani Abbas Akhondi, yenna-d d akken tamurt-nnes tesɛa lebɣi ad tesseǧhed amɛawen adamsan d Lezzayer, ladɣa deg unrar n yibriden.

« Nekkni nebɣa yerna newjed ad necrek ttejṛiba-nneɣ d waytmaten-nneɣ idzayriyen, ama deg uḥric n yibriden neɣ deg wayen niḍen », ɣef wakken ay d-yenna.