Asebter amenzawi

Aheyyi i Teqbuct n Tefriqt n tlawin: Lezzayer d Tunes ffɣent s 1 ɣer 1

LEZZAYER TAMANEɣT – Taɣlamt taɣelnawt tadzayrit n tcirt n uḍar n tlawin teffeɣ s 1 ɣer 1 d texṣim-nnes tatunsit deg temlilit tamidwant (wuddiyya) ay d-yellan deg usarir (malɛab) n Omar Hamadi n Buluɣin i lmend n uheyyi n snat-a n teɣlamin akken ad ttekkint deg Teqbuct n Tefriqt n Yiɣlanen n tlawin.

Iswi atunsi tessadef-it Ella El Kaabachi (deg tedqiqt tis 4), ma d iswi adzayri tessadef-it Djamila Benaissa (tadqiqt tis 78).

Mazal ad rnunt ad urarent teɣlmin-a ass n ljemɛa ay d-yetteddun deg Wammas Atwilan n Tfidiṛalit Tadzayrit n Tcirt n Uḍar deg Sidi Musa (Lezzayer).

Snat-a n temliliyin timidwanin gar Tdzayriyin d Ttunsiyin d aḥric seg tuzzya tamezwarut n temliliyin n waffas (taṣfiyat) n Teqbuct n Tefriqt n Yiɣlanen n 2016, yerna aḥric aneggaru n Teqbuct-a ad d-yili deg Kamrun.

Dɣa, i lmend n waya, Lezzayer ad turar mgal Togo ass n 5 Meɣres 2016 deg Lezzayer Tamaneɣt, sakkin, ad turar timlilit-nnes n wuɣal deg Lome (tamaneɣt n Togo) gar 18 d 20 seg wayyur-nni.