Asebter amenzawi

Aɣref aṣeḥrawi atan deg tegnit n lǧehd yerna qrib ad yerbeḥ imenɣi-nnes (Abdelaziz)

DEXLA (imaziren n yizrazaɣen iṣeḥrawiyen) – Yenna-d umaru amatu n Terni n Polisario, aselway n Tegduda Taɛṛabt Taṣeḥrawit Tamagdayt, Mohamed Abdelaziz, ass n laṛebɛa deg Dexla dakken aɣref aṣeḥrawi atan deg « tegnit n lǧehd » yerna atan la yettqerrib ɣer rrbeḥ deg yimenɣi-nnes.

« Aql-aɣ deg tegnit n ljehd, maci ala seg yidis n lqanun d teɣdet (ɛadala) yellan seg yidis-nneɣ, maca ula seg yidis n umecwaṛ-a ameqran ay d-nekka », ɣef wakken ay d-yenna Mass Abdelaziz deg tinawt (kalima) n urẓam n Uswir (mu’tamar) wis 14 n Terni n Polisario, yerna yenna-d dakken aɣref aṣeḥrawi la yettqerrib ɣer rrbeḥ deg yimenɣi-nnes.

« Ta d tamsalt kan n wakud », ɣef wakken ay d-iwekked, yerna yenna-d dakken azekka n yimenɣi aṣeḥrawi « la yessefṛaḥ » yerna aɣref aṣeḥrawi iger asurif deg tɣara (nawɛiyya) n yimenɣi-nnes ɣef uzarug (istiqlal), am wakken ad yadef waya deg umezruy.

Yenna-d dakken ass-a, la d-yettban uzekka d imsirem, maca yessefk daɣ ad ṣebren Yiṣeḥrawiyen yerna ad kemmlen imenɣi-nsen s uɛewwel deg ubrid n uzarug.

Yebder-d daɣ uselway aṣeḥrawi tuzwirin (awlawiyyat) « yeggten » ay la ttqabalen Yiṣeḥrawiyen ass-a, am wakken ay d-yenna dakken aswir-a « yessefk ad d-yessebded aɣawas (muxaṭṭar) ad yeǧǧen aɣref aṣeḥrawi ad yaweḍ ɣer yiswan n yimenɣi-nnes ».

Dɣa, gar tuzwirin-a, iwekked-d dakken yessefk ad tettwaḥrez tdukli taɣelnawt yerna ad yettwasseǧhed lebni n uwanak (dawla) atrar s tsuda-nnes tislekmanin, timsuḍfin d tɣedmanin.