ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⵉⵖⵔⵉ ⵉ ⵜⵓⴽⵛⵉ ⵏ ⵓⵣⵔⴻⴼ ⵉ ⵎⵉⵏⵓⵔⵙⵧ ⴰⴽⴽⴻⵏ ⴰⴷ ⵜⴻⵜⵜⵄⴰⵙⵙⴰ ⵉⵣⴻⵔⴼⴰⵏ ⵏ ⵓⵎⴷⴰⵏ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ
ⴱⵔⵓⵅⴻⵍⵍⴻⵙ – ⵜⴳⴻⵔ-ⴷ ⵜⵉⵖⵔⵉ ⵜⴻⴳⵔⴰⵡⵜ ⵜⴰⴽⵓⵏⴼⵉⴷⵉⵕⴰⵍⵉⵜ ⵏ ⵓⵣⴻⵍⵎⴰⴹ ⴰⴷⴷⵓⴽⴽⵍⴰⵏ ⵓⵕⵓⴼⵉ/ⴰⵣⴻⵍⵎⴰⴹ ⴰⵣⴻⴳⵣⴰⵡ ⴰⴳⴰⴼⴰⵏ (ⴳⵓⴻ/ⵏⴳⵍ) ⵉ ⵓⵎⵏⵉ (ⴱⴰⵔⵍⴰⵎⴰⵏ) ⵓⵕⵓⴼⵉ ⴰⵙⵙ ⵏ ⵍⴰⵕⴻⴱⵄⴰ ⴰⴽⴽⴻⵏ ⴰⴷ ⵢⴻⵙⵙⵓⵜⴻⵔ ⵙⴻⴳ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⴷ ⵢⴻⴼⴽ ⴰⵣⵔⴻⴼ ⵉ ⵎⵉⵏⵓⵔⵙⵧ (ⵜⵓⵖⴷⴰⴹⵜ ⵏ ⵜⵙⴻⴼⵔⴰⵏⵜ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ) ⴰⴽⴽⴻⵏ ⴰⴷ ⵜⵓⵖⴰⵍ ⴰⴷ ⵜⴻⵜⵜⵄⴰⵙⵙⴰ ⵉⵣⴻⵔⴼⴰⵏ ⵏ ⵓⵎⴷⴰⵏ.
ⴷⴻⴳ ⵢⵉⵡⴻⵏ ⵏ ⵓⵙⴻⵏⴼⴰⵔ ⵏ ⵜⴻⵏⵡⵉⵜ (ⵜⴰⵄⴷⵉⵍ) ⵢⴻⵔⵣⴰⵏ ⴰⵏⴻⵥⵔⵓⴼ ⵓⵜⵔⵉⵎ ⴰⵢ ⴷ-ⵢⴻⵜⵜⵡⴰⵙⵙⵓⵎⵔⴻⵏ ⴷⴻⴳ ⵓⵀⴻⵢⵢⵉ ⵏ ⵢⵉⵡⴻⵜ ⵏ ⵜⵏⴻⵖⵜⵓⵙⵜ (ⵇⴰⵔⴰⵔ) ⵏ ⵓⵎⵏⵉ ⵓⵕⵓⴼⵉ ⵖⴻⴼ ⵓⵕⴰⴱⵓⵍ ⴰⵙⴻⴳⵙⴰⵏ ⵏ 2014 ⵖⴻⴼ ⵢⵉⵣⴻⵔⴼⴰⵏ ⵏ ⵓⵎⴷⴰⵏ ⴷ ⵜⵓⴳⴷⵓⵜ ⴷⴻⴳ ⵓⵎⴰⴹⴰⵍ ⴰⴷ ⵢⴻⵜⵜⵡⴰⴷⴻⵖⵔⴻⵏ ⴰⵙⵙ ⵏ ⵍⴻⵅⵎⵉⵙ, ⵜⴻⵙⵙⵓⵜⴻⵔ ⵜⴻⴳⵔⴰⵡⵜ-ⴰ « ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⴽⴽⴻⵏ ⴰⴷ ⴼⴽⴻⵏ ⵉ ⵎⵉⵏⵓⵔⵙⵧ ⴰⵣⵔⴻⴼ ⴰⴷ ⵜⴻⵜⵜⵄⴰⵙⵙⴰ ⵉⵣⴻⵔⴼⴰⵏ ⵏ ⵓⵎⴷⴰⵏ ⴰⵎ ⵡⴰⴽⴽ ⵜⵓⵖⴷⴰⴹⵉⵏ ⵏⵉⴹⴻⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⵢ ⵉⵅⴻⴷⴷⵎⴻⵏ ⵖⴻⴼ ⵜⵄⴻⵙⵙⴰⵙⵜ ⵏ ⵜⴰⵍⵡⵉⵜ ⴷⴻⴳ ⵓⵎⴰⴹⴰⵍ ».
ⴷⵖⴰ ⵜⵄⴰⵡⴻⴷ ⵜⵡⴻⴽⴽⴻⴷ-ⴷ ⵜⴻⴳⵔⴰⵡⵜ-ⴰ ⴷ ⴰⴽⴽⴻⵏ ⵜⴻⴱⴷⴻⴷ ⵖⴻⵔ ⵢⵉⴷⵉⵙ ⵏ « ⴼⴻⵔⵔⵓ ⵓⵄⴷⵉⵍ ⵢⴻⵔⵏⴰ ⴷ ⴰⴷⵓⵎⴰⵏ ⵏ ⵜⴰⵍⵓⴼⵜ ⵏ ⵓⵏⴻⵥⵔⵓⴼ ⵓⵜⵔⵉⵎ ⵙ ⵓⵇⴰⴷⴻⵔ ⵏ ⵓⵣⵔⴻⴼ ⵏ ⵓⴳⴳⵓⵛⵛⴻⵍⵎⴰⵏ (ⵜⴰⵇⵔⵉⵔ ⴰⵍ-ⵎⴰⵚⵉⵔ) ⵏ ⵓⵖⵔⴻⴼ ⴰⵚⴻⵃⵔⴰⵡⵉ ⴷ ⵜⵏⴻⵖⵜⵓⵙⵉⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵢⴻⵔⵣⴰⵏ ⴰⵢⴰ ».
ⵜⴰⴳⵔⴰⵡⵜ ⵜⴰⴽⵓⵏⴼⵉⴷⵉⵕⴰⵍⵉⵜ ⵏ ⵓⵣⴻⵍⵎⴰⴹ ⴰⴷⴷⵓⴽⴽⵍⴰⵏ ⵓⵕⵓⴼⵉ/ⴰⵣⴻⵍⵎⴰⴹ ⴰⵣⴻⴳⵣⴰⵡ ⴰⴳⴰⴼⴰⵏ (ⴳⵓⴻ/ⵏⴳⵍ) ⴷⴻⴳ ⵓⵎⵏⵉ ⵓⵕⵓⴼⵉ ⵜⴻⵙⵙⵓⵜⴻⵔ ⴷⴰⵖ ⴰⵇⴰⴷⴻⵔ ⵏ ⵢⵉⵣⴻⵔⴼⴰⵏ ⵏ ⵍⵍⵙⴰⵙ ⵏ ⵢⵉⵚⴻⵃⵔⴰⵡⵉⵢⴻⵏ, ⴳⴰⵔ-ⴰⵙⴻⵏ ⴰⵣⵔⴻⴼ ⵏ ⵜⵍⴻⵍⵍⵉ ⵏ ⵜⵉⴷⴷⵓⴽⵍⴰ, ⵏ ⵡⴰⵡⴰⵍ ⴷ ⵜⴻⵎⵍⵉⵍⵉⵜ.
ⵏⵏⵉⴳ ⵡⴰⵢⴰ, ⵜⴰⴳⵔⴰⵡⵜ-ⴰ ⵍⴰ ⴷ-ⵜⴻⵙⵙⵓⵜⵓⵔ ⴷⴰⵖ, ⴷⴻⴳ ⵓⵙⴻⵏⴼⴰⵔ-ⵏⵏⴻⵙ ⵏ ⵜⴻⵏⵡⵉⵜ « ⴰⵙⵍⴻⵍⵍⵉ ⵏ ⵡⴰⴽⴽ ⵉⵎⴻⵃⴱⴰⵙ ⵉⵙⴻⵔⵜⵉⵢⴻⵏ ⵉⵚⴻⵃⵔⴰⵡⵉⵢⴻⵏ » ⵢⴻⵔⵏⴰ ⵜⴻⵙⵙⵓⵜⵓⵔ ⵜⵓⴽⵛⵉ ⵏ ⵓⵣⵔⴻⴼ ⵉ ⵢⵉⵡⴰⵎⵏⵉⵢⴻⵏ (ⴱⴰⵔⵍⴰⵎⴰⵏⵉⵢⵢⵉⵏ), ⵉⵎⴰⵏⴰⵢⴻⵏ (ⵎⵓⵔⴰⵇⵉⴱⵉⵏ) ⵉⵎⵣⵉⵔⴳⴻⵏ ⴷ ⵜⵓⴷⴷⵙⵉⵡⵉⵏ ⵜⵉⵔⵏⴰⴱⴰⴹⵉⵏ ⴰⴽⴽⴻⵏ ⴰⴷ « ⴰⴷⴼⴻⵏ ⵖⴻⵔ ⵢⵉⴽⴰⵍⴻⵏ ⵏ ⵓⵏⴻⵥⵔⵓⴼ ⵓⵜⵔⵉⵎ »
