Asebter amenzawi

Tiɣri i tukci n uzref i Minurso akken ad tettɛassa izerfan n umdan deg Uneẓruf Utrim

BRUXELLES – Tger-d tiɣri tegrawt takunfidiṛalit n Uzelmaḍ Addukklan Uṛufi/Azelmaḍ Azegzaw Agafan (GUE/NGL) i Umni (barlaman) Uṛufi ass n laṛebɛa akken ad yessuter seg Yiɣlanen Yeddukklen ad yefk azref i MINURSO (tuɣdaḍt n tsefrant deg Uneẓruf Utrim) akken ad tuɣal ad tettɛassa izerfan n umdan.

Deg yiwen n usenfar n tenwit (taɛdil) yerzan Aneẓruf Utrim ay d-yettwassumren deg uheyyi n yiwet n tneɣtust (qarar) n Umni Uṛufi ɣef uṛabul asegsan n 2014 ɣef yizerfan n umdan d tugdut deg umaḍal ad yettwadeɣren ass n lexmis, tessuter tegrawt-a « Iɣlanen Yeddukklen akken ad fken i MINURSO azref ad tettɛassa izerfan n umdan am wakk tuɣdaḍin niḍen n Yiɣlanen Yeddukklen ay ixeddmen ɣef tɛessast n talwit deg umaḍal ».

Dɣa tɛawed twekked-d tegrawt-a d akken tebded ɣer yidis n « ferru uɛdil yerna d aduman n taluft n Uneẓruf Utrim s uqader n uzref n ugguccelman (taqrir al-maṣir) n uɣref aṣeḥrawi d tneɣtusin n Yiɣlanen Yeddukklen yerzan aya ».

Tagrawt takunfidiṛalit n Uzelmaḍ Addukklan Uṛufi/Azelmaḍ Azegzaw Agafan (GUE/NGL) deg Umni Uṛufi tessuter daɣ aqader n yizerfan n llsas n Yiṣeḥrawiyen, gar-asen azref n tlelli n tiddukla, n wawal d temlilit.

Nnig waya, tagrawt-a la d-tessutur daɣ, deg usenfar-nnes n tenwit « aslelli n wakk imeḥbas isertiyen iṣeḥrawiyen » yerna tessutur tukci n uzref i yiwamniyen (barlamaniyyin), imanayen (muraqibin) imzirgen d tuddsiwin tirnabaḍin akken ad « adfen ɣer yikalen n Uneẓruf Utrim »