Asebter amenzawi

Benghebrit: aqeyyem amaynut n yibalmuden

LEZZAYER TAMANEɣT – Tenna-d tneɣlaft n ussegmi aɣelnaw, Nouria Benghebrit, ass n lexmis deg Ldzayer Tamaneɣt dakken ad yettwaḍfer yiwen n unagraw (niḍam) d amaynu n uqeyyem n yibalmuden deg uɣerbaz, yerna anagraw-a ad yeɛreḍ ad d-yaf swaswa ayen aydeg ixuṣṣ ubalmud deg yal tanga (madda) akken ad t-ɛawnen ad d-yerfed aswir-nnes.

« Anagraw n uqeyyem n yibalmuden ad d-yili uɛawed n tmuɣli deg-s. Anagraw-a (akken yella ass-a) d win n uqeyyem amatu (tizmilin [ɛalamat] d timawin), maca ad yuɣal d anagraw aydeg ad ɛerḍen ad d-afen swaswa ayen aydeg ixuṣṣ ubalmud deg yal tanga akken ad yifsus ferru n wuguren-nnes yerna ad yettwaɛawen », ɣef wakken ay d-tenna tneɣlaft deg yiwet n terzi ɣef kra n yiɣerbazen i lmend n tukci n yiṛabulen n tezmilin n tsemhuyt (faṣl) tamezwarut.

« Aqeyyem amatu n ubalmud deg kra n tenga ibanen ur d-yefki ara igmaḍ, dɣa ɣef waya ad d-yili unadi ɣef tɣawsiwin aydeg ixuṣṣ ubalmud deg yal tanga akken ad yettwaɛawen deg-sent », ɣef wakken ay d-tenna.

D amaswaḍ (mufattic) n ussegmi ad yuraren dduṛ ameqran akk deg ccɣel-a, acku d netta ay yett)ḍafaren aselmad yerna yettɛassa-t, ɣef wakken ay d-tenna Massa Benghebrit, am wakken ay d-tger tiɣri i umaswaḍ akken ad d-igen aṭas n temsal deg leḥsab deg wayen yerzan assenṣeb (tarsim) n yiselmaden, gar-asent tamussni-nsen deg ṣṣenɛa d ussegmi.

Ula d anemhal n uɣerbaz yetturar dduṛ s wazal-nnes s tigin n yifadden i yiselmaden akken ad d-fken igmaḍ igerrzen ugar deg tgara n useggas, yerna yessefk ad d-yili waya s uḍfar d uqader n tugrint (inḍibaṭ).