Asebter amenzawi
Imenɣi mgal usserwel n sselɛa: afettec n yixxamen deg Debdab
LEZZAYER TAMANEɣT – Yenna-d ass n lexmis uɣlif n temḥaddit taɣelnawt dakken imeẓla n tɣellist (amn) fettcen ixxamen n kra n yimdanen ay yettwassnen s uttekki-nsen deg usserwel n sselɛa deg taddart n Mriksan, deg tɣiwant n Debdab ay d-yusan ɣef tlisa tidzayriyin, yerna yella-d waya s « uqader n lqanun yerna war tuffɣa i ubrid».
« I lmend n waya, yenna-d uɣlif n temḥaddit taɣelnawt dakken imeẓla n tɣellist, deg ukatar n lecɣal-nsen yerna s lewṣaya n yimwekkel n tegduda, fettcen ixxamen n kra n yimdanen ay yettwassnen, uqbel, s uttekki-nsen deg lecɣal n usserwel n sselɛa deg temnaḍt-a, yerna yella-d waya s uqader n yilugan yerna war tuffɣa i ubrid », ɣef wakken ay d-yenna uɣlif deg yiwen n ulɣu (bayan).
Yenna-d uɣlif aya deffir ma yenna-d yiwen n umaslaḍ (ɛuḍw) n Usina n twilayt n Ilizi, Abbes Bouamama, i kra n ttawilat n yisalan dakken « yettwali ayen ay gan kra n yimestulen (darakiyyin) deg ufettec n yixxamen deg taddart n Mriksan d anbac ay yessawḍen ɣer umennuɣ gar yimestulen d kra n yilemẓiyen ».
Yenna-d daɣ uɣlif dakken lecɣal-a « ssawḍen ɣer uḥbas n kra n lecɣal n yimsettiyen (muharribin) d usseǧhed n lḥeṛs fell-asen, » dɣa d aya ay yeǧǧan kra n yilemẓiyen ad d-awin tikli yeffɣen i ubrid war ma terra tmara.
« Deffir ma gan yiduba ay terza temsalt tasestant (taḥqiq) deg wayen yerzan ddiɛayat n usseqdec n yiɣil, wekkden-d yimdanen yettwaqadaren deg temnaḍt-a, s tirawt, mi mlalen d umenzaḍ n uḥric amehlan n In Amennas (Tamnaḍt Taserdasant tis 4) dakken imestulen gan ccɣel-nsen s uqader n ṣṣenɛa d lqanun, yerna aya yeḥrez iɣermanen (muwaṭinin) d wayla-nsen seg ussexṣer d truẓi n yimesbaniyen », ɣef wakken ay d-iwekked uɣlif n temḥaddit taɣelnawt.
