ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴱⴻⵏⴽⵀⴰⵍⴼⴰ ⴷⴻⴳ ⵜⵓⵏⴻⵙ ⵉ ⵓⵙⵙⴻⴱⴷⴻⴷ ⵏ ⵜⴱⴰⵏⴽⴰ ⵏ ⵍⵎⴻⵖⵔⴻⴱ ⵉ ⵓⵙⵙⴻⴼⵜⵉ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵜⵜⴻⴽⴽⴰ ⵓⵏⴻⵖⵍⴰⴼ ⵏ ⵜⴻⴷⵔⵉⵎⵜ, ⴰⴱⴷⴻⵔⵔⴰⵀⵎⴰⵏⴻ ⴱⴻⵏⴽⵀⴰⵍⴼⴰ, ⴰⵙⵙ ⵏ ⵍⴻⵜⵏⵉⵢⴻⵏ ⴷⴻⴳ ⵜⵓⵏⴻⵙ, ⴷⴻⴳ ⵜⴻⵎⵍⵉⵍⵉⵜ ⵏ ⵓⴳⵔⴰⵡ ⴰⵎⴰⵜⵓ ⵏ ⵓⵙⵙⴻⴱⴷⴻⴷ ⵏ ⵜⴱⴰⵏⴽⴰ ⵏ ⵍⵎⴻⵖⵔⴻⴱ ⵏ ⵓⵙⵙⴻⴼⵜⵉ ⴷ ⵜⵏⴻⵣⵣⵓⵜ (ⵜⵉⴵⴰⵔⴰ) ⵜⵓⴼⴼⵉⵖⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵡⴻⵏ ⵏ ⵓⵍⵖⵓ (ⴱⴰⵢⴰⵏ) ⵏ ⵓⵖⵍⵉⴼ.

ⵜⴰⴱⴰⵏⴽⴰ-ⴰ ⵜⴻⵙⵄⴰ ⵕⴰⵙⴻⵍⵎⴰⵍ ⵏ 150 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ, ⵢⴻⵔⵏⴰ ⵜⵜⴻⴽⴽⴰⵏⵜ ⴷⴻⴳ-ⵙ ⵜⵎⵓⵔⴰ ⵏ ⵜⴷⵓⴽⵍⵉ ⵏ ⵍⵎⴻⵖⵔⴻⴱ ⴰⵄⵕⴰⴱ, ⵢⴰⵍ ⵢⵉⵡⴻⵜ ⵙ 37,5 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ.

ⴰⵙⵙⴻⴱⴷⴻⴷ ⵏ ⵜⴱⴰⵏⴽⴰ ⵏ ⵍⵎⴻⵖⵔⴻⴱ ⵉ ⵓⵙⵙⴻⴼⵜⵉ ⴷ ⵜⵏⴻⵣⵣⵓⵜ ⵜⵓⴼⴼⵉⵖⵜ ⴷ ⴰⵃⵔⵉⵛ ⵙⴻⴳ ⵓⵙⵙⴻⴼⵄⴻⵍ ⵏ ⵓⵎⵜⴰⵡⴰ (ⵉⵜⵜⵉⴼⴰⵇ) ⴰⵢ ⵙⵜⴻⵏⵢⴰⵏⵜ 5 ⵏ ⵜⵎⵓⵔⴰ ⵢⴻⵍⵍⴰⵏ ⴷⴻⴳ ⵜⴷⵓⴽⵍⵉ ⵏ ⵍⵎⴻⵖⵔⴻⴱ ⴰⵄⵕⴰⴱ (ⵍⴻⵣⵣⴰⵢⴻⵔ, ⵜⵓⵏⴻⵙ, ⵎⴻⵕⵕⵓⴽ, ⵍⵉⴱⵢⴰ ⴷ ⵎⵓⵔⵉⵟⴰⵏⵢⴰ). ⴷ ⵍⴻⵣⵣⴰⵢⴻⵔ ⴰⴷ ⵉⵍⵉⵏ ⴷ ⵜⴰⵙⴻⵍⵡⴰⵢⵜ-ⵏⵏⴻⵙ ⵜⴰⵎⴻⵣⵡⴰⵔⵓⵜ.

ⵉⵙⵡⵉ ⵏ ⵜⴱⴰⵏⴽⴰ-ⴰ ⴷ ⴰⵜⵜⴻⴽⴽⵉ ⴷⴻⴳ « ⵍⴻⴱⵏⵉ ⵏ ⵜⴷⴰⵎⵙⴰ ⵜⴰⵎⵖⴰⵔⴱⵉⵜ ⵢⴻⵏⵏⵓⵎⵎⴷⴻⵏ (ⵎⵓⴷⵎⴰⴵⴰ) ⵙ ⵓⵜⵜⴻⴽⴽⵉ ⴷⴻⴳ ⵓⵙⵙⵉⴷⵔⴻⵎ ⵏ ⵢⵉⵙⴻⵏⴼⴰⵔⴻⵏ ⵓⵛⵔⵉⴽⴻⵏ ⴷⴻⴳ ⵜⴼⴻⵍⵍⴰⵃⵜ, ⵜⴰⵎⴳⵓⵔⵉ (ⵚⵉⵏⴰⵄⴰ) ⴷ ⵢⵉⵃⵔⵉⵛⴻⵏ ⵏⵉⴹⴻⵏ, ⴷ ⵓⵙⵙⴻⴱⵖⴻⵙ ⵏ ⵓⵎⴱⴰⴷⴷⴻⵍ ⴰⴷⴰⵎⵙⴰⵏ ⴳⴰⵔ ⵜⵎⵓⵔⴰ ⵏ ⵜⴻⵎⵏⴰⴹⵜ, ⴰⵎ ⵡⴰⴽⴽⴻⵏ ⴰⴷ ⵜⵄⴰⵡⴻⵏ ⵜⴱⴰⵏⴽⴰ-ⴰ ⵉⵙⴻⵏⴼⴰⵔⴻⵏ ⵉⴷⴰⵎⵙⴰⵏⴻⵏ ⴰⴷ ⵉⴷⵓⵎⴻⵏ ⴷ ⵡⵉⴷ ⴰⵢ ⴷ-ⵢⴻⵙⵙⴰⴷⴰⴼⴻⵏ ⵉⴷⵔⵉⵎⴻⵏ ⴷⴻⴳ ⵜⴻⵎⵏⴰⴹⵜ-ⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⴱⴷⴻⵔ ⵓⵖⵍⵉⴼ.

ⵜⵉⵎⵍⵉⵍⵉⵢⵉⵏ ⴷ ⵓⵎⵛⵉⵡⴻⵕ ⵖⴻⴼ ⵜⴱⴰⵏⴽⴰ-ⴰ ⴰⴷ ⴷ-ⵉⵍⵉⵏ ⴳⴰⵔ ⵢⵉⴷⵓⴱⴰ ⵉⴷⵔⵉⵎⴰⵏⴻⵏ (ⵙⵓⵍⵓⵟⴰⵜ ⵎⴰⵍⵉⵢⵢⴰ) ⵏ 5 ⵏ ⵜⵎⵓⵔⴰ ⵏ ⵍⵎⴻⵖⵔⴻⴱ ⵙ ⵓⵎⵄⴰⵡⴻⵏ ⵏ ⵜⵎⴰⵔⵉⵜ ⵜⴰⵎⴰⵜⵓⵜ ⵏ ⵜⴷⵓⴽⵍⵉ.