Asebter amenzawi

Tṣerref Lezzayer 5 n yimelyaṛen n yidulaṛen ɣef ussizdeg n waman seg 2000 ɣer 2013

LEZZAYER TAMANEɣT - Tessefti Lezzayer 450 n yimelyaṛen n yidinaṛen de lebni n yisenfaren n uɣram d ussizdeg n waman gar 2000 d 2013, yerna la tessaram ad tessiweḍ seg-a ɣer 2030 ɣer tegnit aydeg ur tettzelli ara akk aman yumsen ɣer ugama, ɣef wakken ay d-yenna ass n letniyen uɣlif n teɣbula (mawarid) n waman d twennaḍt.

Idrimen ay d-yettwaḥazen i uɣram d ussizdeg n waman wwḍen ɣer 450 n yimelyaṛen n yidinaṛen gar 2000 d 2013, ɣef leḥsab n yiwen n lkaɣeḍ n Uzenziɣ Aɣelnaw n Usnefli n Ussizdeg (SNDA) ay d-yettunefken i tɣemsa deg yiwen n wass atekni ɣef ukemmel n tezrawt-a (dirasa) yerzan azenziɣ (muxaṭṭaṭ) ay la d-yettilin s umɛawen d Tdukli Tuṛufit (EAU II).

Isseftiyen-a sseddan mliḥ ɣer sdat tuqqna n yimezdaɣen ɣer yiẓeḍwan n uɣram d ussizdeg n waman, yerna yewweḍ waya ɣer 94% deg temnaḍin timdinanin d 80% deg temnaḍin n ugama.

Lezzayer tesɛa, imir-a, 171 n teɣsar (maḥaṭṭat) n ussizdeg n waman yumsen yerna sɛant tazmert n ujemmal n 900 n n yimelyunen n yimitren igasasen (m3), yili deg 2000, tella tesɛa ala 10 n teɣsar.

« Ussisen-a (maǧhudat) ǧǧan tamurt ad tessemɣer tizemmar-nnes n ussizdeg n waman. Deg 2000, tella tesɛa tazmert n uɣram n waman yumsen i 1,3 d amelyun n yimezdaɣen, maca deg 2013, tewweḍ ad tesɛu tazmert n uɣram n waman i 12,4 n yimelyunen n yimezdaɣen », ɣef wakken ay d-yenna lkaɣeḍ-a ay d-iheyya uɣlif d Tdukli Tuṛufit.

D acu kan, aɣram d ussizdeg n waman mazal-it d acrirrew ameqran ay yessefk ad t-tqabel Lezzayer deg 15 n yiseggasen ay d-yetteddun s tuqqna n wakk imezdaɣen n tmurt ɣer uẓeḍḍa n uɣram n waman d win n ussizdeg, yerna arma d ass-nni ad tessiweḍ Lezzayer ɣer yiswi wis 6 n usnefli (tanmiya) aduman n Yiɣlanen Yeddukklen i 2030 yerzan tuqqna n wakk imezdaɣen ɣer uẓeḍḍa n waman n tissit d win n uɣram n waman yumsen.