Asebter amenzawi
Iban yella wassaɣ gar tehyufin d rrebrab (Lamamra)
WEHṚAN – Yenna-d uneɣlaf n tɣawsiwin n uzɣar, Ramtane Lamamra, ass n letniyen deg Wehṛan, dakken « iban yella wassaɣ gar ussetti n tehyufin d rrebrab ».
« Assaɣ (ɛalaqa) gar ussetti n tehyufin d rrebrab iban. Assetti-a d taɣbalut ayseg d-ttagment tegrawin tirebrabin idrimen, am lfedyat-nni ay d-yettekken seg yimeṛhan. Aseqqamu n Tɣellist (amn) n Yiɣlanen Yeddukklen yeddem iḥezziben deg wanect-a yerna yessefk ad d-nerr lwelha-nneɣ ɣef wamek ad ten-nessefɛel », ɣef wakken ay d-yenna uneɣlaf deg tgara n udiwenni ay iga d umtil-nnes n Angula deg yijifeṛ n Usarag n Uswir unnig n Talwit d Tɣellist deg Tefriqt.
Deg wayen yerzan lecɣal ay d-yellan deg Tefriqt i lmend n yimenɣi mgal ussetti n tehyufin, yesmekti-d uneɣlaf ɣef ussebded, ussan-a ay yezrin, n temsulta (curṭa) tafriqit n Afripol ay yesɛan axxam-nnes deg Lezzayer Tamaneɣt.
« Ṛṛay-a adzayri ad yesseǧhed ttawilat n umɛawen gar tmura n Tefriqt i uqabel n yicqirrwen am ussetti n tehyufin, tijrimin izegren i tlisa d tejrimt yettwassuddsen », ɣef wakken ay d-iwekked, am wakken ay d-yerna dakken Tafriqt tesmenyaf ttawilat n talwit i yimenɣi mgal uxeṣṣar-a.
Yebder-d daɣ Ramtane Lamamra Aseqqamu-nni n Yimasnagen (ḥukama’) Ifriqiyen ay yessedday udiplumati adzayri Lakhdar Brahimi. Aseqqamu-a yesselwi-t daɣ uselway ameṛḥum Ahmed Benbella.
« Aseqqamu-a n Yimasnagen tettcawaṛ-it Useqqamu i Talwit d Tɣellist n Tdukli Tafriqit. Aseqqamu-a i Talwit yesɛa aṭas n ttawilat i yimenɣi mgal rrebrab gar-asen iɣallen ifriqiyen (ucriken) », ɣef wakken ay d-yenna.
