Asebter amenzawi
Iḥezziben d imeqranen i urgal n ubrid i yirebraben ay d-yettasen ɣer Tefriqt
WEHṚAN – Yenna-d Yimwekkel i Talwit d Tɣellist deg Tdukli Tafriqit, Smail Chergui, ass n letniyen deg Wehṛan d akken ttwaddmen yiḥezziben d imeqranen i urgal n ubrid i wuɣal n yirebraben ɣer tmura-nsen tineṣliyin.
« Timura n Tefriqt, ladɣa tid ayseg qelɛen yiǧihadiyen, ddment iḥezziben d imeqranen i urgal n ubrid i yirebraben-a ay yebɣan ad d-uɣalen ɣer tmura-nsen tineṣliyin », ɣef wakken ay d-iwekked Mass Chergui deg yiwet n tseɣrut (taṣriḥ) i Tnegga n Yisalan n Lezzayer deg yijifeṛ n Usarag wis 3 n Uswir Unnig ɣef Talwit d Tɣellist deg Tefriqt.
Iḥezziben-a ddment-ten tmura tifriqiyin deg ukatar (iṭar) n umɛawen n Tdukli Tafriqit ladɣa imi ay d-tella tugdi seg wuɣal n yiǧihadiyen ɣer Tefriqt deffir tedyanin-a tineggura ay la d-yettilin deg Ugmuḍ (ccerq) Alemmas, ɣef wakken ay d-iwekked.
Dɣa deg temsalt-a, yenna-d Mass Chergui d akken akala (masar) n Ǧibuti yesɛa azal, yerna akala-a d ttawil niḍen ad tesseqdec Tefriqt deg unrar n umɛawen aɣellisan (amni) d umbaddel n wumlan (istixbarat) ɣef wayen ay yessefken ad yettweg deg Tefriqt i uḍman n tɣellist.
« Ttawil-a ay yerzan timura n ugmuḍ n Tefriqt d yiwen seg ttawilat yesɛan azal i urgal n ubrid i tuggziwin (tahdidat) n wuɣal n yiǧihadiyen », ɣef wakken ay d-iwekked.
