Asebter amenzawi

Taluft n Libya: yessefk ad qeblen yidisan niḍen lufeq yettwastenyan seg melmi kan

WEHṚAN – Yenna-d ugensas (mumattil) uzzig n Tseqqamut n Tdukli Tafriqit deg Libya, Moundhir El Rezki, ass n letniyen deg Wehṛan, d akken amtawa (ittifaq) aneggaru ay stenyan Yilibiyen ddaw leɛnaya n Yiɣlanen Yeddukklen, yessefk ad rnun ad t-stenyin yidisan yemxaṣamen yellan deg temnaḍin tilqayanin n Libya.

Kra seg tegrawin n temnaḍin n daxel tmurt n Libya ugint ad wemmṛent amtawa-nni ay yettwastenyan ass n 17 Dujembeṛ yezrin, imi ay ugint kra n tɣawsiwin deg-s, ɣef wakken ay d-yenna yimḍebber-a i Tnegga n Yisalan n Lezzayer deg yijifeṛ n Usarag wis 3 n Uswir Unig ɣef Talwit d Tɣellist (amn) deg Tefriqt, ay la d-yettilin deg Wehṛan.

Dɣa yenna-d d akken yessefk ad yettunefk wazal i tegrawin-a yerna ad yettwassen wayen ay la d-ssumurent (taqtariḥ) akken « ad yettwaḍmen uttekki-nsent deg umtawa-nni aserti d ussefɛel-nnes deg unrar », ɣef wakken ay d-yenna, am wakken ay yesḥassef imi idisan-a ɣaben yerna ur d-ttwabedren ara deg umtawa-nni.

« Assefɛel n umtawa-a ad d-yili yewɛeṛ war tamsetlelt (taḍamun) n wakk idisan ilibiyen, attekki-nsen d udhal-nsen (daɛm) akken ad yerbeḥ umtawa-a », ɣef wakken ay d-iwekked.

Yenna-d daɣ yimḍebber-a d akken assefɛel n umtawa-a yessefk ad d-yili s uɛawen sɣur tmura tinaragin (ǧara) d tuddsiwin tifriqiyin d tegraɣlanin.

Dɣa deg temsalt-a, yesmekti-d s yizwuren (mubadarat) n tmura tinaragin i uɛawen n ferru n taluft n Libya, am wakken ay d-iwekked azal n temlilit n Lezzayer Tamaneɣt (n 1 Dujembeṛ 2015) yellan d aḥric seg wussisen (maǧhudat) n Yiɣlanen Yeddukklen i uɛawen n tifrat s talwit deg Libya, d temliliyin-nni n Tunes (10 d 11 Dujembeṛ) d Ṛuma (13 Dujembeṛ).