Asebter amenzawi

Yenqes waǧaw n sskeṛ s 20% deg 11 n wayyuren

LEZZAYER TAMANEɣT – Yenqes waǧaw n sskeṛ s wugar n 20% deg ssuma d 6% deg tesmekta (kammiyya) deg 11 n wayyuren imezwura n useggas n 2015 ma nquren tallit-a ɣer yilindi (2014) ɣef wakken ay d-tenna Tedwant i Tnegga n Yisalan n Lezzayer.

Seg Yennayer ɣer tgara n Nwembeṛ, yenqes waǧaw n sskeṛ (n ubiṭrab, aɣanim n sskeṛ, asiru n ulakṭuz d ulakṭuz aquran) ɣer 654,68 n yimelyunen n yidulaṛen, yili deg tallit-nni deg 2014, yesqam-d waǧaw n sskeṛ 825,15 n yimelyunen n yidulaṛen (d anqas s 20,66%), ɣef leḥsab n Wammas Aɣelnaw n Tsenselkimt d Taddadanin n Tedwant (CNIS).

Tasmekta n waǧaw n sskeṛ tenqes-d ɣer 1,71 d amelyun n yiṭunen, yili deg 2014, tasmekta-a tewweḍ ɣer 1,83 d amelyun n yiṭunen (d anqas s 6,62%).

Tafatuṛt-a tenqes-d ɣef lǧal n unqas n ssuma n sskeṛ azubaɣ d sskeṛ amellal deg ssuq amaḍlan ɣef lǧal n uɣelluy deg ssuma n uqariḍ (ɛumla) abrizili ɣef leḥsab n udulaṛ amarikani d lɣella yelhan n uɣanim n sskeṛ.

Brizil d nettat ay d tanfarast (muntiǧa) tamezwarut akk n sskeṛ deg umaḍal yerna la tessefray ad tessiweḍ ɣer lɣella n 604 n yimelyunen n yiṭunen n sskeṛ i useggas-a n 2015-2016, d lɣella ad ilin d aklis (raqm qiyasi). 80% seg sskeṛ n umaḍal yettekk-d seg uɣanim n sskeṛ.

Ayen ay yesneqsen daɣ ssuma n sskeṛ deg umaḍal d afares (intaǧ) n sskeṛ deg Lhend ay yuɣalen d tanfarast tis snat tameqrant akk deg umaḍal, yerna la tessefray ad teḥbes aǧaw n sskeṛ deg 2016.