Asebter amenzawi

Yemmut Hocine Ait Ahmed, d argaz n tsertin, d azamul n Tegrawla

LEZZAYER – Hocine Ait Ahmed, yemmut ass n larebɛa deg Lausanne (Swis) deg leɛmer-is 89 iseggasen, yella d yiwen seg yemdebren n Tegrawla tazzayrit akked daɣen d amasay n ukabar n Tirni n yiɣalen inemnayen (FFS), ideg yella d amesbeddi.

Deg yiseggasen-a yezrin tazmert-is teɣli, yuḍen acḥal n tikkal, ṭṭfen-t yisehwa n wul (AVC) deg yennayer yezrin i iḥuzan amḍiq iseg d-yettas wawal. Iduwa deg Lausanne anda yella yezdeɣ.

Ilul deg Ɛin Lḥemmam (Tizi Uzzu) deg useggas n 1926, Ait Ahmed yella d yiwen seg iɣella igejdanen deg Tirni n teslellit taɣelnawt (FLN) deg Tegrawla n 1 wember 1954.

Qbel akken, yekcem Akabar n uɣref azzayri (PPA) d netta i d amsumer n uɣnaw n Tuddsa tuzzigt (OS), i yessedda, deg ubdil n Mohamed Belouizdad.

D ameɣnas n tmentilt taɣelnawt seg mi yella d ilemẓi, Aït Ahmed yessassen, deg useggas n 1948, yiwen n urabul, iɣef d-ttinin d agejdan, ɣef talɣa akked tsetratijit n umennuɣ umrig i uzarug.

Seg d newwi azarug-nneɣ, yeffeɣ seg FLN, sakin iɣnew-d deg useggas n 1963, akabar-is FFS, d akabar amezwaru n tenmegla deg Lezzayer.