ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵔⵥⴰⵎ ⵏ ⵜⵎⵓⴳⴻⵔⵜ ⵜⵉⵙ 24 ⵏ ⵙⵙⴻⵍⵄⴰ ⵜⴰⵖⴻⵍⵏⴰⵡⵜ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵔⵥⴻⵎ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⴰⵙⵙ ⵏ ⵍⴰⵕⴻⴱⵄⴰ ⵜⴰⵎⵓⴳⴻⵔⵜ ⵜⵉⵙ 24 ⵏ ⵓⴼⴰⵔⴻⵙ (ⵉⵏⵜⴰⴵ) ⴰⵖⴻⵍⵏⴰⵡ ⴰⴷ ⵉⴽⴻⵎⵎⵍⴻⵏ ⴰⵔⵎⴰ ⴷ ⴰⵙⵙ ⵏ ⵜⵜⵍⴰⵜⴰ ⴷⴻⴳ ⵍⴻⵇⵚⴻⵔ ⵏ ⵜⵣⵉⴽⴽⵏⵉⵏ (ⵍⴷⵣⴰⵢⴻⵔ ⵜⴰⵎⴰⵏⴻⵖⵜ).

ⵜⴰⵎⵓⴳⴻⵔⵜ ⵏ ⵓⵙⴻⴳⴳⴰⵙ-ⴰ ⵜⴻⵍⵍⴰ-ⴷ ⵙ ⵓⵙⴻⵏⵜⴻⵍ ⵏ « ⴰⴼⴰⵔⴻⵙ ⴰⴷⵣⴰⵢⵔⵉ ⴷ ⴹⴹⵎⴰⵏⴰ ⵏ ⵜⴷⴰⵎⵙⴰ ⴰⵢ ⵍⴰ ⵢⴻⵜⵜⴱⴻⴷⴷⵉⵍⴻⵏ », ⵢⴻⵔⵏⴰ ⵜⵜⴻⴽⴽⴰⵏⵜ ⴷⴻⴳ-ⵙ 356 ⵏ ⵜⴻⵕⵎⵉⵙⵉⵏ (ⵛⴰⵔⵉⴽⴰⵜ) ⵜⵉⵖⴻⵍⵏⴰⵡⵉⵏ ⴷⴻⴳ ⵜⵊⵓⵎⵎⴰ ⵏ 13.000 ⵏ ⵍⵎⵉⵜⵔⴰⵜ ⵜⵉⵎⴽⵓⵥⵉⵏ (ⵎ3).

ⵉⵃⵔⵉⵛⴻⵏ ⵉⴳⴻⵊⴷⴰⵏⴻⵏ ⴰⵢ ⵢⴻⵍⵍⴰⵏ ⴷⴻⴳ ⵜⵎⵓⴳⴻⵔⵜ-ⴰ ⴷ ⵡⵉⴷ ⵏ ⵜⵓⵞⵞⵉⵜ ⴷ ⵓⵊⴻⵍⵍⴻⵍ ⵙ 78 ⵏ ⵜⴻⵕⵎⵉⵙⵉⵏ, ⵜⵉⵎⴳⵓⵔⵉⵢⵉⵏ ⵜⵉⵎⴻⴽⵏⵉⵢⵉⵏ (ⵚⵉⵏⴰⵄⴰⵜ ⵎⵉⴽⴰⵏⵉⴽⵉⵢⵢⴰ), ⵜⵉⵎⴳⵓⵔⵉⵢⵉⵏ ⵏ ⵢⵉⵎⵖⵓⵣⴻⵏ ⴷ ⵡⵓⵣⵣⴰⵍ ⵙ 69 ⵏ ⵜⴻⵕⵎⵉⵙⵉⵏ, ⵜⵉⵎⴳⵓⵔⵉⵢⵉⵏ ⵜⵉⴽⵔⵓⵔⴰⵏⵉⵏ ⴷ ⵜⵒⵉⵜⵕⵓⴽⵔⵓⵔⴰⵏⵉⵏ ⵙ 64 ⵏ ⵜⴻⵕⵎⵉⵙⵉⵏ ⴷ ⵜⴻⵕⵎⵉⵙⵉⵏ ⵏ ⵢⵉⵎⴻⵥⵍⴰ ⵏ ⵜⴻⴷⵔⵉⵎⵜ ⵙ 55 ⵏ ⵢⵉⵎⵜⵜⴻⴽⴽⵉⵢⴻⵏ.

ⵜⵉⵎⴳⵓⵔⵉⵢⵉⵏ ⵏ ⵓⵖⵔⴰⴼ (ⵜⴰⵚⵏⵉⵄ) ⵃⴻⴷⵕⴻⵏⵜ ⴷⴻⴳ ⵜⵎⵓⴳⴻⵔⵜ-ⴰ ⵙ 54 ⵏ ⵜⴻⵕⵎⵉⵙⵉⵏ ⵖⴻⵔ ⵢⵉⴷⵉⵙ ⵏ ⵜⴻⵎⴳⵓⵔⵉⵢⵉⵏ ⵏ ⵜⵔⵉⵙⵉⵜⵉ, ⵏ ⵜⵍⵉⴽⵜⵕⵓⵏⵉⵜ ⴷ ⵢⵉⵙⵓⴳⴰ ⵏ ⵜⵔⵉⵙⵉⵜⵉ ⵏ ⵓⵅⵅⴰⵎ ⵙ 36 ⵏ ⵜⴻⵕⵎⵉⵙⵉⵏ.

ⵉⵙⵡⵉ ⵏ ⵜⵎⵓⴳⴻⵔⵜ-ⴰ ⴷ ⴰⵙⵎⴰⵍ ⵏ ⵓⴼⴰⵔⴻⵙ ⴰⵖⴻⵍⵏⴰⵡ ⵉ ⵍⵎⴻⵏⴷ ⵏ ⵓⵙⵙⴻⵏⵇⴻⵙ ⵏ ⵡⴰⴵⴰⵡ ⵙⴻⴳ ⵜⵎⵓⵔⴰ ⵏ ⵓⵣⵖⴰⵔ, ⵢⴻⵔⵏⴰ ⴰⴷ ⵢⵉⵍⵉ ⵡⴰⵢⴰ ⴷ ⵜⵜⴰⵡⵉⵍ ⵉ ⵓⵏⴻⵡⵡⴻⵄ ⵏ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ ⴷⴻⴳ ⵜⴻⴳⵏⵉⵜ-ⴰ ⴰⵢⴷⴻⴳ ⵢⴻⵏⵇⴻⵙ ⵙ ⵡⴰⵟⴰⵙ ⵓⵎⴻⴷⵅⵓⵍ ⵏ ⵓⵒⵉⵜⵕⵓⵍ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⴳⴰⵏ-ⴷ, ⴷⴻⴳ ⵜⵎⵓⴳⴻⵔⵜ-ⴰ, ⵢⵉⵡⴻⵜ ⵏ ⵜⴻⵎⵏⴰⴹⵜ ⵉ ⵓⵙⵙⴻⵏⵣⵉ ⵏ ⵙⵙⴻⵍⵄⴰ, ⵜⴻⵙⵄⴰ ⵜⴰⵊⵓⵎⵎⴰ (ⵎⵉⵙⴰⵃⴰ) ⵏ 3000 ⵏ ⵢⵉⵎⵉⵜⵔⴻⵏ ⵉⵎⴽⵓⵥⴻⵏ (ⵎ3).