ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⵓⵖⴰⵍ-ⴷ ⵚⵚⵢⴰⴷⴰ ⵏ ⵓⵎⴻⵕⵊⴰⵏ ⴷⴻⴼⴼⵉⵔ 15 ⵏ ⵢⵉⵙⴻⴳⴳⴰⵙⴻⵏ ⵏ ⵓⵃⴱⴰⵙ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵜⵜⵓⵏⴻⴼⴽ, ⵙⴻⴳ ⵎⴻⵍⵎⵉ ⴽⴰⵏ, ⵜⵜⴻⵙⵔⵉⵃ ⵉ ⵓⵖⴻⵍⵍⴻⵜ ⵏ ⵓⵎⴻⵕⵊⴰⵏ ⴷⴻⴼⴼⵉⵔ ⵎⴰ ⵢⴻⵃⴱⴻⵙ ⵡⴰⵢⴰ 15 ⵏ ⵢⵉⵙⴻⴳⴳⴰⵙⴻⵏ, ⵢⴻⵔⵏⴰ ⴰⴷ ⵢⴻⴱⴷⵓ ⵡⴰⵢⴰ ⴷⴻⴳ ⵜⴻⴼⵙⵓⵜ ⴰⵢ ⴷ-ⵢⴻⵜⵜⴻⴷⴷⵓⵏ, ⵖⴻⴼ ⵡⴰⴽⴽⴻⵏ ⴰⵢ ⴰⵖ-ⴷ-ⵢⴻⵏⵏⴰ ⴰⵙⵙ ⵏ ⵍⴰⵕⴻⴱⵄⴰ ⵢⵉⵡⴻⵏ ⵏ ⵢⵉⵎⴹⴻⴱⴱⴻⵔ ⵓⵏⵏⵉⴳ ⵏ ⵓⵖⵍⵉⴼ ⵏ ⵜⴼⴻⵍⵍⴰⵃⵜ.

ⴷ ⵍⵇⴰⵏⵓⵏ ⴰⵎⴰⵢⵏⵓ ⵏ ⵚⵚⵢⴰⴷⴰ ⴷ ⵜⴽⴻⵙⵙⴰⵡⵜ ⵏ ⵢⵉⵙⴻⵍⵎⴰⵏ ⴰⵢ ⵢⴻⵜⵜⵡⴰⵇⴻⴱⵍⴻⵏ ⴷⴻⴳ ⵎⴻⵖⵔⴻⵙ ⵢⴻⵣⵔⵉⵏ ⴷⴻⴳ ⵓⵎⵏⵉ (ⴱⴰⵔⵍⴰⵎⴰⵏ) ⴰⵢ ⵢⴻⴼⴽⴰⵏ ⵜⵜⴻⵙⵔⵉⵃ ⵉ ⵡⵓⵖⴰⵍ ⵖⴻⵔ ⵚⵚⵢⴰⴷⴰ ⵏ ⵓⵎⴻⵕⵊⴰⵏ, ⵢⴻⵔⵏⴰ ⵚⵚⵢⴰⴷⴰ-ⴰ « ⴰⴷ ⵜⴻⴱⴷⵓ ⴷⴻⴳ ⵜⴻⴼⵙⵓⵜ, ⴳⴰⵔ ⵎⴻⵖⵔⴻⵙ ⴷ ⵢⴻⴱⵔⵉⵔ 2016 » ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵖⴻⴼ ⵏ ⵓⴷⵉⵡⴰⵏ ⴷ-ⵢⴻⵍⵀⴰⵏ ⵙ ⵚⵚⵢⴰⴷⴰ ⵖⴻⵔ ⵓⵖⵍⵉⴼ ⵏ ⵜⴼⴻⵍⵍⴰⵃⵜ, ⴽⴰⵎⴻⵍ ⵏⴻⴳⵀⴻⵍⵉ, ⴷⴻⴳ ⵢⵉⵊⵉⴼⴻⵕ ⵏ ⵡⴰⵙⵙ ⵏ ⵓⵅⴻⴱⴱⴻⵔ ⵉ ⵍⴼⴰⵢⴷⴰ ⵏ ⵜⴻⵕⵎⵉⵙⵉⵏ (ⵛⴰⵔⵉⴽⴰⵜ) ⴰⵢ ⵜⴻⵔⵣⴰ ⵜⴻⵎⵙⴰⵍⵜ ⵉ ⵍⵎⴻⵏⴷ ⵏ ⵓⵅⴻⴱⴱⴻⵔ-ⵏⵙⴻⵏ ⵖⴻⴼ ⵍⴻⵇⵡⴰⵏⵉⵏ ⵉⵎⴰⵢⵏⵓⵜⴻⵏ ⵢⴻⵔⵣⴰⵏ ⴰⵖⴻⵍⵍⴻⵜ ⵏ ⵓⵎⴻⵕⵊⴰⵏ.

ⵓⵇⴱⴻⵍ ⵎⴰ ⵜⴻⴱⴷⴰ ⵜⵃⴻⵎⵍⴰ-ⴰ ⵏ ⵚⵚⵢⴰⴷⴰ, ⴰⴷ ⴷ-ⵜⵉⵍⵉ ⵜⴰⵍⵍⵉⵜ ⵉ ⵜⵓⴽⵛⵉ ⵏ ⵢⵉⵣⴻⵔⴼⴰⵏ ⵏ ⵓⵖⴻⵍⵍⴻⵜ, ⵢⴻⵔⵏⴰ ⴰⴷ ⵜⴻⴱⴷⵓ ⵙⴻⴳ ⵢⵉⵎⵉⵔ-ⴰ ⴰⵔⵎⴰ ⴷ ⵜⴰⵣⵡⴰⵔⴰ ⵏ ⵢⴻⵏⵏⴰⵢⴻⵔ ⴰⴽⴽⴻⵏ ⴰⴷ ⴵⴵⴻⵏ ⵜⵉⵕⵎⵉⵙⵉⵏ ⴰⴷ ⴷ-ⴼⴽⴻⵏⵜ ⵉⵙⵓⵎⴰⵔ-ⵏⵙⴻⵏⵜ (ⵄⵓⵔⵓⴹ).

ⵙⴰⴽⴽⵉⵏ, ⴷ ⴰⵡⴰⵍⵉ ⴰⴷ ⴷ-ⵢⴻⵙⵙⵓⴽⴽⴻⵏ ⵜⵉⵟ ⵖⴻⴼ ⵢⵉⴽⴰⵔⴰⵎⴻⵏ (ⵎⵉⵍⴰⴼⴼⴰⵜ) ⵏ ⵜⴻⵕⵎⵉⵙⵉⵏ, ⵢⴻⵔⵏⴰ ⵜⵉⴷ ⴰⴷ ⵢⴻⵜⵜⵡⴰⵇⴻⴱⵍⴻⵏ, ⴰⴷ ⵣⴻⵎⵔⴻⵏⵜ ⴰⴷ ⵜⵜⴻⴽⴽⵉⵏⵜ ⴷⴻⴳ ⵡⵓⵔⵎⵉⵜⴻⵏ (ⵎⵓⵣⴰⵢⴰⴷⴰ) ⴰⴽⴽⴻⵏ ⴰⴷ ⵜⴻⵏⵜ-ⵉⴷ-ⵉⵚⴰⵃ ⵜⵜⴻⵙⵔⵉⵃ ⴰⴷ ⵖⴻⵍⵍⵜⴻⵏⵜ ⴰⵎⴻⵕⵊⴰⵏ.

ⵎⴰⵛⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵏⴻⴳⵀⴻⵍⵉ, ⴷⴻⴼⴼⵉⵔ 15 ⵏ ⵢⵉⵙⴻⴳⴳⴰⵙⴻⵏ, ⴰⵙⴻⴳⴳⴰⵙ ⵏ 2016 ⴰⴷ ⵢⵉⵍⵉ ⴷ « ⴰⵙⴻⴳⴳⴰⵙ ⵏ ⵓⵄⵔⴰⴹ » ⴷⴻⴳ ⵓⵖⴻⵍⵍⴻⵜ ⵏ ⵓⵎⴻⵕⵊⴰⵏ ⴰⴽⴽⴻⵏ « ⴰⴷ ⵏⵥⴻⵔ ⴰⵎⴻⴽ ⵢⴻⵍⵍⴰ ⵓⵏⵔⴰⵔ ⴷⴻⴳ ⵜⵉⴷⴻⵜ ».

« ⴰⴷ ⵏⴻⴹⴼⴻⵔ ⵙ ⵍⵇⴻⵔⴱ ⵛⵛⵖⴻⵍ-ⴰ ⵢⴻⵔⵏⴰ ⴰⴷ ⵏⴻⵙⵡⴰⵜⵉ ⵏⴻⵖ ⴰⴷ ⴷ-ⵏⴻⵙⵙⴻⴼⵀⴻⵎ ⴽⵔⴰ ⵏ ⵢⵉⴷⵙⴰⵏ ⵢⴻⵔⵣⴰⵏ ⴰⵢⴰ ⵎⴰ ⵜⴻⵔⵔⴰ ⵜⵎⴰⵔⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴰⵖⴻⵍⵍⴻⵜ ⵏ ⵓⵎⴻⵕⵊⴰⵏ ⵢⴻⵃⴱⴻⵙ-ⵉⵜ ⵍⵇⴰⵏⵓⵏ ⴷⴻⴳ 2000 ⵖⴻⴼ ⵍⴵⴰⵍ ⵏ ⵓⵖⴻⵍⵍⴻⵜ ⵢⴻⴽⴽⴰⵏ ⵉ ⵜⵍⵉⵙⴰ, ⴷ ⴰⵛⵓ ⴽⴰⵏ, ⴰⵖⴻⵍⵍⴻⵜ-ⴰ ⵉⴽⴻⵎⵎⴻⵍ ⵙ ⵜⵉⵏ ⵏ ⵜⵓⴽⴻⵔⴹⴰ.

ⵖⴻⴼ ⵡⴰⵢⴰ, ⵍⵇⴰⵏⵓⵏ ⴰⵎⴰⵢⵏⵓ ⵏ ⵚⵚⵢⴰⴷⴰ ⵢⴻⵙⴱⴰⵏ-ⴷ ⵉⵎⴻⵏⵣⴰⵢⴻⵏ (ⵎⴰⴱⴰⴷⵉ’) ⵏ ⵚⵚⵢⴰⴷⴰ ⵜⴰⴷⵓⵎⴰⵏⵜ ⴰⴷ ⵉⵃⵓⴷⴷⴻⵏ ⵜⵉⵖⴱⵓⵍⴰ (ⵎⴰⵡⴰⵔⵉⴷ) ⵏ ⵍⴻⴱⵃⴻⵕ, ⵢⴻⵔⵏⴰ ⵜⴻⴼⴽⴰ ⵜⵜⴻⵙⵔⵉⵃ ⵉ ⵓⵖⴻⵍⵍⴻⵜ ⵏ ⵓⵎⴻⵕⵊⴰⵏ, ⴰⵎ ⵡⴰⴽⴽⴻⵏ ⴰⵢ ⴷ-ⵉⴳⴻⵔ ⵉⵃⴻⵣⵣⵉⴱⴻⵏ ⵉ ⵓⵃⴱⴰⵙ ⵏ ⵓⵖⴻⵍⵍⴻⵜ ⵏ ⵓⵎⴻⵕⵊⴰⵏ ⴱⴻⵕⵕⴰ ⵉ ⵍⵇⴰⵏⵓⵏ ⴷ ⵡⵉⴷ ⴰⴷ ⵢⴻⴵⴵⴻⵏ ⵜⴰⴷⴰⵎⵙⴰ ⴰⴷ ⴷ-ⵜⴻⵙⴼⴰⵢⴷⵉ ⵙⴻⴳ ⵓⵖⴻⵍⵍⴻⵜ ⵏ ⵙⵙⴻⵍⵄⴰ-ⴰ ⴰⵢ ⵢⴻⵙⵄⴰⵏ ⴰⵣⴰⵍ ⴷ ⴰⵎⴻⵇⵔⴰⵏ ⴷⴻⴳ ⵙⵙⵓⵇ.