Asebter amenzawi

Tuɣal-d ṣṣyada n umeṛjan deffir 15 n yiseggasen n uḥbas

LEZZAYER TAMANEɣT – Yettunefk, seg melmi kan, ttesriḥ i uɣellet n umeṛjan deffir ma yeḥbes waya 15 n yiseggasen, yerna ad yebdu waya deg tefsut ay d-yetteddun, ɣef wakken ay aɣ-d-yenna ass n laṛebɛa yiwen n yimḍebber unnig n uɣlif n tfellaḥt.

D lqanun amaynu n ṣṣyada d tkessawt n yiselman ay yettwaqeblen deg Meɣres yezrin deg umni (barlaman) ay yefkan ttesriḥ i wuɣal ɣer ṣṣyada n umeṛjan, yerna ṣṣyada-a « ad tebdu deg tefsut, gar Meɣres d Yebrir 2016 » ɣef wakken ay d-yenna yiɣef n udiwan d-yelhan s ṣṣyada ɣer uɣlif n tfellaḥt, Kamel Negheli, deg yijifeṛ n wass n uxebber i lfayda n teṛmisin (carikat) ay terza temsalt i lmend n uxebber-nsen ɣef leqwanin imaynuten yerzan aɣellet n umeṛjan.

Uqbel ma tebda tḥemla-a n ṣṣyada, ad d-tili tallit i tukci n yizerfan n uɣellet, yerna ad tebdu seg yimir-a arma d tazwara n Yennayer akken ad ǧǧen tiṛmisin ad d-fkent isumar-nsent (ɛuruḍ).

Sakkin, d awali ad d-yessukken tiṭ ɣef yikaramen (milaffat) n teṛmisin, yerna tid ad yettwaqeblen, ad zemrent ad ttekkint deg wurmiten (muzayada) akken ad tent-id-iṣaḥ ttesriḥ ad ɣelltent ameṛjan.

Maca, ɣef wakken ay d-yenna Mass Negheli, deffir 15 n yiseggasen, aseggas n 2016 ad yili d « aseggas n uɛraḍ » deg uɣellet n umeṛjan akken « ad nẓer amek yella unrar deg tidet ».

« Ad neḍfer s lqerb ccɣel-a yerna ad neswati neɣ ad d-nessefhem kra n yidsan yerzan aya ma terra tmara », ɣef wakken ay d-yenna.

Aɣellet n umeṛjan yeḥbes-it lqanun deg 2000 ɣef lǧal n uɣellet yekkan i tlisa, d acu kan, aɣellet-a ikemmel s tin n tukerḍa.

ɣef waya, lqanun amaynu n ṣṣyada yesban-d imenzayen (mabadi’) n ṣṣyada tadumant ad iḥudden tiɣbula (mawarid) n lebḥeṛ, yerna tefka ttesriḥ i uɣellet n umeṛjan, am wakken ay d-iger iḥezziben i uḥbas n uɣellet n umeṛjan beṛṛa i lqanun d wid ad yeǧǧen tadamsa ad d-tesfaydi seg uɣellet n sselɛa-a ay yesɛan azal d ameqran deg ssuq.