Asebter amenzawi

Arẓam n tbankiwin tidzayriyin deg uzɣar « yewɛeṛ »

LEZZAYER TAMANEɣT – Yenna-d uneɣlaf n tedrimt, Abderrahmane Benkhalfa, dakken tikli i urẓam n tneggiwin (wakalat) n tbankiwin tinagdudin (ɛumumiyya) tidzayriyin deg tmura n uzɣar tewɛeṛ, ladɣa ɣef lǧal n tegnit tamirant n tbankiwin tidzayriyin.

Yella-d waya d tiririt i yiwet n tuttra yuran sɣur yiwen n umazan (na’ib) ɣef urẓam n tneggiwin n tbankiwin tidzayriyin deg uzɣar akken ad zemren Yidzayriyen ay izedɣen deg uzɣar ad jemɛen idrimen-nsen deg tbankiwin-a, ad sseftin yerna ad ttekkin deg usnefli (tanmiya) n tdamsa taɣelnawt, dɣa yenna-d uneɣlaf dakken tamsalt-a teḥwaǧ « ad ifak usmeskel ay la d-yettilin imir-a deg uḥric n tbankiwin ».

Afaki n usmeskel-a (iṣlaḥ) d « ccerḍ ayɣef ur telli trewla » akken ad zemrent tbankiwin ad qadrent ilugan igraɣlanen yerna ad ilint deg tegnit aydeg ad zemrent ad reẓment tineggiwin deg uzɣar yerna ad srebḥent isseftiyen-nsent din, ɣef wakken ay d-iwekked Mass Benkhalfa.

Akala-a (masar) n urẓam n tbankiwin tidzayriyin deg uzɣar ad iḥettem ɣef tbankiwin ad ssnent mliḥ ttawilat n ussefrek (tasyir) d ussidrem n wass-a, ɣef wakken ay d-yenna uneɣlaf, yerna yenna-d dakken aya d ccerḍ ayɣef ur telli trewla i lmend n ussewseɛ n lecɣal n tbankiwin tidzayriyin ɣer uzɣar. Aya, ɣef leḥsab-nnes, ur yezmir ad d-yili ala s uksab n tmussni ay iwatan deg uswir agraɣlan.

Menɣir ttawilat d yiḥezziben itwilanen (tiqniyya), yenna-d uneɣlaf daɣ dakken yessefk tibankiwin-a ad sɛunt ula d tadrimt ad tent-yeǧǧen ad adfent ɣer ssuq abeṛṛani, imi tuffɣa ɣer uzɣar teḥwaǧ « ṛaselmal d ameqran » i lmend n ussezgi n tbankiwin-a i yibeddilen ay d-yettilin deg « tignatin timaynutin ».