Asebter amenzawi

Asnerni n sselɛa taɣelnawt i unewweɛ n tdamsa

LEZZAYER TAMANEɣT – Iɛewwel unabaḍ (ḥukuma) s tidet akken ad d-yesduqqes ttawilat n ufares (intaǧ) aɣelnaw, imi d wa ay d ttawil ay yettwali iwata i unewweɛ n tdamsa n tmurt.

D aya ay iɛawed iwekked-it-id uneɣlaf amenzu, Abdelmalek Sellal, mi yerẓem, ass n laṛebɛa, tamugert (maɛraḍ) tis 24 n ufares aɣelnaw ad d-yilin gar 23 d 29 Dujembeṛ deg Leqṣer n Tzikknin (deg Uzumbi n Yilel, Ldzayer Tamaneɣt).

Mi yerza ɣef tnefsarin (aǧniḥa) yemgerraden n tmugert-a, iger-d Mass Sellal tiɣri i yimḍebbren n teṛmisin (carikat) tiɣelnawin, tinagdudin d tusligin, akken ad sselhun afares n sselɛa ama seg yidis n tɣara, ama seg win n tesmekta, akken ad ttekkin deg unewweɛ n tdamsa d ussenqes n waǧaw seg uzɣar.

Iɛawed iwekked-d uneɣlaf amenzu, deg tegnit-a, dakken yessefk Ldzayer ad tesseǧhed assiǧew n sselɛa yexḍan apitṛul d lgaz i unewweɛ n umedxul-nnes n yidrimen ibeṛṛaniyen d ussenqes n lexṣara deg lmizan n ttjaṛa, d lexṣara ay d-yebdan deg 2015 deffir n wacḥal n yiseggasen aydeg tadamsa tadzayrit tella deg lfayda.

S waya, yessefk tiṛmisin tiɣelnawin ad ttekkint ugar deg tiddit n unabaḍ i lmend n ussenqes n waǧaw d usseǧhed n ufares aɣelnaw.

Yesmeḥses Mass Sellal, daɣ, i yiɣeblan n teṛmisin ay yettekkan deg tmugert-a, ladɣa deg wayen yerzan iɛewwiqen ay d-ttmagarent deg tedbelt akken ad sseftint d yiɛewwiqen n wawwaḍ ɣer leswaq uffiɣen, maca yenna-d Mass Sellal dakken awanak (dawla) yewjed akken ad yebded i lmendad n teṛmisin-a.

« Newwɛet ifarisen-nwen (mantuǧ) d yisseftiyen-nwen yerna nekkni ad ken-nɛawen », ɣef wakken ay d-iṛeggem uneɣlaf amenzu i teṛmisin-a, am wakken ay asent-d-iger tiɣri akken ad d-gent ticcurkiwin gar-asent.