ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⵏⴻⵔⵏⵉ ⵏ ⵙⵙⴻⵍⵄⴰ ⵜⴰⵖⴻⵍⵏⴰⵡⵜ ⵉ ⵓⵏⴻⵡⵡⴻⵄ ⵏ ⵜⴷⴰⵎⵙⴰ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵉⵄⴻⵡⵡⴻⵍ ⵓⵏⴰⴱⴰⴹ (ⵃⵓⴽⵓⵎⴰ) ⵙ ⵜⵉⴷⴻⵜ ⴰⴽⴽⴻⵏ ⴰⴷ ⴷ-ⵢⴻⵙⴷⵓⵇⵇⴻⵙ ⵜⵜⴰⵡⵉⵍⴰⵜ ⵏ ⵓⴼⴰⵔⴻⵙ (ⵉⵏⵜⴰⴵ) ⴰⵖⴻⵍⵏⴰⵡ, ⵉⵎⵉ ⴷ ⵡⴰ ⴰⵢ ⴷ ⵜⵜⴰⵡⵉⵍ ⴰⵢ ⵢⴻⵜⵜⵡⴰⵍⵉ ⵉⵡⴰⵜⴰ ⵉ ⵓⵏⴻⵡⵡⴻⵄ ⵏ ⵜⴷⴰⵎⵙⴰ ⵏ ⵜⵎⵓⵔⵜ.

ⴷ ⴰⵢⴰ ⴰⵢ ⵉⵄⴰⵡⴻⴷ ⵉⵡⴻⴽⴽⴻⴷ-ⵉⵜ-ⵉⴷ ⵓⵏⴻⵖⵍⴰⴼ ⴰⵎⴻⵏⵣⵓ, ⴰⴱⴷⴻⵍⵎⴰⵍⴻⴽ ⵙⴻⵍⵍⴰⵍ, ⵎⵉ ⵢⴻⵔⵥⴻⵎ, ⴰⵙⵙ ⵏ ⵍⴰⵕⴻⴱⵄⴰ, ⵜⴰⵎⵓⴳⴻⵔⵜ (ⵎⴰⵄⵔⴰⴹ) ⵜⵉⵙ 24 ⵏ ⵓⴼⴰⵔⴻⵙ ⴰⵖⴻⵍⵏⴰⵡ ⴰⴷ ⴷ-ⵢⵉⵍⵉⵏ ⴳⴰⵔ 23 ⴷ 29 ⴷⵓⵊⴻⵎⴱⴻⵕ ⴷⴻⴳ ⵍⴻⵇⵚⴻⵔ ⵏ ⵜⵣⵉⴽⴽⵏⵉⵏ (ⴷⴻⴳ ⵓⵣⵓⵎⴱⵉ ⵏ ⵢⵉⵍⴻⵍ, ⵍⴷⵣⴰⵢⴻⵔ ⵜⴰⵎⴰⵏⴻⵖⵜ).

ⵎⵉ ⵢⴻⵔⵣⴰ ⵖⴻⴼ ⵜⵏⴻⴼⵙⴰⵔⵉⵏ (ⴰⴵⵏⵉⵃⴰ) ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⴳⴻⵔⵜ-ⴰ, ⵉⴳⴻⵔ-ⴷ ⵎⴰⵙⵙ ⵙⴻⵍⵍⴰⵍ ⵜⵉⵖⵔⵉ ⵉ ⵢⵉⵎⴹⴻⴱⴱⵔⴻⵏ ⵏ ⵜⴻⵕⵎⵉⵙⵉⵏ (ⵛⴰⵔⵉⴽⴰⵜ) ⵜⵉⵖⴻⵍⵏⴰⵡⵉⵏ, ⵜⵉⵏⴰⴳⴷⵓⴷⵉⵏ ⴷ ⵜⵓⵙⵍⵉⴳⵉⵏ, ⴰⴽⴽⴻⵏ ⴰⴷ ⵙⵙⴻⵍⵀⵓⵏ ⴰⴼⴰⵔⴻⵙ ⵏ ⵙⵙⴻⵍⵄⴰ ⴰⵎⴰ ⵙⴻⴳ ⵢⵉⴷⵉⵙ ⵏ ⵜⵖⴰⵔⴰ, ⴰⵎⴰ ⵙⴻⴳ ⵡⵉⵏ ⵏ ⵜⴻⵙⵎⴻⴽⵜⴰ, ⴰⴽⴽⴻⵏ ⴰⴷ ⵜⵜⴻⴽⴽⵉⵏ ⴷⴻⴳ ⵓⵏⴻⵡⵡⴻⵄ ⵏ ⵜⴷⴰⵎⵙⴰ ⴷ ⵓⵙⵙⴻⵏⵇⴻⵙ ⵏ ⵡⴰⴵⴰⵡ ⵙⴻⴳ ⵓⵣⵖⴰⵔ.

ⵉⵄⴰⵡⴻⴷ ⵉⵡⴻⴽⴽⴻⴷ-ⴷ ⵓⵏⴻⵖⵍⴰⴼ ⴰⵎⴻⵏⵣⵓ, ⴷⴻⴳ ⵜⴻⴳⵏⵉⵜ-ⴰ, ⴷⴰⴽⴽⴻⵏ ⵢⴻⵙⵙⴻⴼⴽ ⵍⴷⵣⴰⵢⴻⵔ ⴰⴷ ⵜⴻⵙⵙⴻⴵⵀⴻⴷ ⴰⵙⵙⵉⴵⴻⵡ ⵏ ⵙⵙⴻⵍⵄⴰ ⵢⴻⵅⴹⴰⵏ ⴰⵒⵉⵜⵕⵓⵍ ⴷ ⵍⴳⴰⵣ ⵉ ⵓⵏⴻⵡⵡⴻⵄ ⵏ ⵓⵎⴻⴷⵅⵓⵍ-ⵏⵏⴻⵙ ⵏ ⵢⵉⴷⵔⵉⵎⴻⵏ ⵉⴱⴻⵕⵕⴰⵏⵉⵢⴻⵏ ⴷ ⵓⵙⵙⴻⵏⵇⴻⵙ ⵏ ⵍⴻⵅⵚⴰⵔⴰ ⴷⴻⴳ ⵍⵎⵉⵣⴰⵏ ⵏ ⵜⵜⵊⴰⵕⴰ, ⴷ ⵍⴻⵅⵚⴰⵔⴰ ⴰⵢ ⴷ-ⵢⴻⴱⴷⴰⵏ ⴷⴻⴳ 2015 ⴷⴻⴼⴼⵉⵔ ⵏ ⵡⴰⵛⵃⴰⵍ ⵏ ⵢⵉⵙⴻⴳⴳⴰⵙⴻⵏ ⴰⵢⴷⴻⴳ ⵜⴰⴷⴰⵎⵙⴰ ⵜⴰⴷⵣⴰⵢⵔⵉⵜ ⵜⴻⵍⵍⴰ ⴷⴻⴳ ⵍⴼⴰⵢⴷⴰ.

ⵙ ⵡⴰⵢⴰ, ⵢⴻⵙⵙⴻⴼⴽ ⵜⵉⵕⵎⵉⵙⵉⵏ ⵜⵉⵖⴻⵍⵏⴰⵡⵉⵏ ⴰⴷ ⵜⵜⴻⴽⴽⵉⵏⵜ ⵓⴳⴰⵔ ⴷⴻⴳ ⵜⵉⴷⴷⵉⵜ ⵏ ⵓⵏⴰⴱⴰⴹ ⵉ ⵍⵎⴻⵏⴷ ⵏ ⵓⵙⵙⴻⵏⵇⴻⵙ ⵏ ⵡⴰⴵⴰⵡ ⴷ ⵓⵙⵙⴻⴵⵀⴻⴷ ⵏ ⵓⴼⴰⵔⴻⵙ ⴰⵖⴻⵍⵏⴰⵡ.

ⵢⴻⵙⵎⴻⵃⵙⴻⵙ ⵎⴰⵙⵙ ⵙⴻⵍⵍⴰⵍ, ⴷⴰⵖ, ⵉ ⵢⵉⵖⴻⴱⵍⴰⵏ ⵏ ⵜⴻⵕⵎⵉⵙⵉⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⵎⵓⴳⴻⵔⵜ-ⴰ, ⵍⴰⴷⵖⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵉⵄⴻⵡⵡⵉⵇⴻⵏ ⴰⵢ ⴷ-ⵜⵜⵎⴰⴳⴰⵔⴻⵏⵜ ⴷⴻⴳ ⵜⴻⴷⴱⴻⵍⵜ ⴰⴽⴽⴻⵏ ⴰⴷ ⵙⵙⴻⴼⵜⵉⵏⵜ ⴷ ⵢⵉⵄⴻⵡⵡⵉⵇⴻⵏ ⵏ ⵡⴰⵡⵡⴰⴹ ⵖⴻⵔ ⵍⴻⵙⵡⴰⵇ ⵓⴼⴼⵉⵖⴻⵏ, ⵎⴰⵛⴰ ⵢⴻⵏⵏⴰ-ⴷ ⵎⴰⵙⵙ ⵙⴻⵍⵍⴰⵍ ⴷⴰⴽⴽⴻⵏ ⴰⵡⴰⵏⴰⴽ (ⴷⴰⵡⵍⴰ) ⵢⴻⵡⵊⴻⴷ ⴰⴽⴽⴻⵏ ⴰⴷ ⵢⴻⴱⴷⴻⴷ ⵉ ⵍⵎⴻⵏⴷⴰⴷ ⵏ ⵜⴻⵕⵎⵉⵙⵉⵏ-ⴰ.

« ⵏⴻⵡⵡⵄⴻⵜ ⵉⴼⴰⵔⵉⵙⴻⵏ-ⵏⵡⴻⵏ (ⵎⴰⵏⵜⵓⴵ) ⴷ ⵢⵉⵙⵙⴻⴼⵜⵉⵢⴻⵏ-ⵏⵡⴻⵏ ⵢⴻⵔⵏⴰ ⵏⴻⴽⴽⵏⵉ ⴰⴷ ⴽⴻⵏ-ⵏⵄⴰⵡⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵉⵕⴻⴳⴳⴻⵎ ⵓⵏⴻⵖⵍⴰⴼ ⴰⵎⴻⵏⵣⵓ ⵉ ⵜⴻⵕⵎⵉⵙⵉⵏ-ⴰ, ⴰⵎ ⵡⴰⴽⴽⴻⵏ ⴰⵢ ⴰⵙⴻⵏⵜ-ⴷ-ⵉⴳⴻⵔ ⵜⵉⵖⵔⵉ ⴰⴽⴽⴻⵏ ⴰⴷ ⴷ-ⴳⴻⵏⵜ ⵜⵉⵛⵛⵓⵔⴽⵉⵡⵉⵏ ⴳⴰⵔ-ⴰⵙⴻⵏⵜ.