Asebter amenzawi
Tagrawla Tazzayrit: imenɣi imselleḥ iḥuza-d ula d anẓul
TAMENɣEST – Yenna-d uneɣlaf n yimjahden, Tayeb Zitouni, ass n lexmis deg In Ṣaleḥ (Tamenɣest) dakken assebded n wasun (manṭiqa) n unẓul deg ṭṭrad n uslelli aɣelnaw d ayen ay yesɛan azal.
« Assebded n udmar (ǧabha) n unẓul (ǧanub) deg ṭṭrad-nneɣ urbiḥ i uslelli aɣelnaw yella-d d aɛawen ameqran i tegrawla taɣelnawt yerna yessken-d waya azraɛ n yimenɣi imselleḥ mgal ussehres deg wakk timnaḍin n wakal aɣelnaw », ɣef wakken ay d-iwekked Mass Zitouni deg tgermant-nnes mi yebda usarag aɣelnaw ɣef « Udmar n Unẓul d uttekki-nnes deg Ṭṭrad n Uslelli ».
Dɣa yenna-d uneɣlaf dakken « tamnaḍt n unẓul tella ddaw ṛṛay n tsuta tamezwarut n yimjahden, gar-asen amjahed Abdelaziz Bouteflika (umi ttinin Abdelkader Lmali), Mohamed Cherif Messaadia, Ahmed Draya, Abdallah Belhouchet, Ahmed Bensebgueg d yirfiqen niḍen n yimenɣi, yerna aya yettekka mliḥ deg ussemɣer n yimenɣi imselleḥ », yerna yella-d waya uqbel ma yuɣal udmar n unẓul yesɛa tuɣdaḍt d tasuddsant (istratiǧiyya) imi ay yuɣal d tamnaḍt n uɛawen n yimussa n uslelli n tmura n Tefriqt talqayant.
« Anzaḍ (qiyada) n ṭṭrad n uslelli yella yuki s wazal n ussebded n udmar n unẓul i ussewseɛ n yimenɣi imselleḥ ɣer wakk timnaḍin n wakal aɣelnaw yerna yeẓra dakken timnaḍin n Tdikelt d Uhaggar llant mazal cfant ɣef yimenɣi-nsent (mgal Fṛansa) », ɣef wakken ay d-yenna uneɣlaf n yimjahden.
Dɣa, i lmend n waya, yerra tajmilt uneɣlaf i tebɣest (caǧaɛa) d yimenɣi urbiḥ n yimezdaɣen n temnaḍt n Tdikelt ay iqublen iɣallen ihersanen (istiɛmariyya) deg waṭas n yimennuɣen imsellḥen, gar-asen win n Fgigira d win n Dɣamca deg temnaḍt n In Ṣaleḥ, d yimenɣi n yimezdaɣen n yiɣerman n temnaḍt n In Ɣar, wid ay yuran ismawen-nsen s yisekkilen n wureɣ deg umezruy n Tegrawla Tadzayrit.
Aɣlif n yimjahden la ixeddem akken ad yeẓẓu azalen n tegrawla n 1u n Nwembeṛ d umussu aɣelnaw, yerna la d-yettili waya s uheyyi n yiwen n wahil aɣelnaw i usfugel n tedyanin timeqranin n umezruy, ɣef wakken ay d-yenna uneɣaf ay d-yegren tiɣri, i lmend n waya, i yimnadiyen d yinelmaden akken ad d-asen ɣer yisalayen (mataḥif) n yimjahden d tsuda (mu’assasat) timezruyanin yellan deg wakk timnaḍin n tmurt akken ad ttekkin, ad d-agmen neɣ ad d-lemden ɣef umezruy n Ldzayer.
