ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵓⵔ ⵜⴻⵜⵜⵄⴻⵟⵟⵉⵍ ⴰⵔⴰ ⴰⴷ ⵜⴻⴼⵔⵓ ⵜⴰⵍⵓⴼⵜ ⵏ ⵜⵏⴻⵣⴷⵓⵖⵜ

ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵏⵏⴰ-ⴷ ⵓⵏⴻⵖⵍⴰⴼ ⵏ ⵜⵏⴻⵣⴷⵓⵖⵜ ⴷ ⵜⴻⵎⴷⵉⵏⵜ, ⴰⴱⴷⴻⵍⵎⴰⴷⵊⵉⴷ ⵜⴻⴱⴱⵧⵓⵏⴻ, ⴰⵙⵙ ⵏ ⵙⵙⴻⴱⵜ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⴷ ⴰⴽⴽⴻⵏ ⵜⴰⵍⵓⴼⵜ ⵏ ⵜⵏⴻⵣⴷⵓⵖⵜ ⵓⵔ ⵜⴻⵜⵜⵄⴻⵟⵟⵉⵍ ⴰⵔⴰ ⴰⴷ ⵜⴻⴼⵔⵓ ⵙ ⵓⴼⴰⴽⵉ ⵏ ⵍⴻⴱⵏⵉ ⵏ 450.000.

« ⴰⵇⵍ-ⴰⵖ ⵍⴰ ⵏⴻⵜⵜⴻⴷⴷⵓ ⴰⴷ ⵏⴻⴼⵔⵓ ⵜⴰⵍⵓⴼⵜ ⵏ ⵜⵏⴻⵣⴷⵓⵖⵜ ⵉⵎⵉ ⴰⵢ ⵅⵓⵚⵚⴻⵏⵜ ⴰⵍⴰ 450.000 ⵏ ⵜⵏⴻⵣⴷⵓⵖⵉⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵜⴻⴱⴱⵧⵓⵏⴻ ⴷⴻⴳ ⵢⵉⵡⴻⵏ ⵏ ⵓⵎⵢⴰⴳⴻⵔ ⵏ ⵓⵇⴻⵢⵢⴻⵎ ⵏ ⵓⵃⵔⵉⵛ ⵏ ⵜⵏⴻⵣⴷⵓⵖⵜ ⵉ ⵓⵙⴻⴳⴳⴰⵙ ⵏ 2015.

ⵎⵉ ⴰⴷ ⵜⴻⴼⵔⵓ ⵜⴰⵍⵓⴼⵜ-ⴰ ⵏ ⵍⴻⵅⵚⴰⵚ ⵏ ⵜⵏⴻⵣⴷⵓⵖⵜ ⵢⴻⵍⵍⴰⵏ ⵉⵎⵉⵔ-ⴰ, ⴰⵃⵔⵉⵛ ⵏ ⵜⵏⴻⵣⴷⵓⵖⵜ ⴰⴷ ⴷ-ⵢⴻⵍⵀⵓ ⴰⵍⴰ ⴷ ⵢⵉⵙⵙⵓⵜⵔⴻⵏ ⵏ ⵜⵏⴻⵣⴷⵓⵖⵜ ⴰⵢ ⴷ-ⵢⴻⵜⵜⵉⵍⵉⵏ ⵢⴰⵍ ⴰⵙⴻⴳⴳⴰⵙ ⴷⴻⴳ ⵙⵙⵓⵇ.

ⵢⴻⵏⵏⴰ-ⴷ ⴷⴰⵖ ⵓⵏⴻⵖⵍⴰⴼ ⴷ ⴰⴽⴽⴻⵏ ⵎⵉ ⴰⴷ ⵜⴻⴼⵔⵓ ⵜⴰⵍⵓⴼⵜ ⵏ ⵜⵏⴻⵣⴷⵓⵖⵜ, ⴰⴷ ⵓⵔⴰⵔⴻⵏⵜ ⵜⴻⵕⵎⵉⵙⵉⵏ (ⵛⴰⵔⵉⴽⴰⵜ) ⵜⵓⵙⵍⵉⴳⵉⵏ ⴷⴷⵓⵕ ⴷ ⴰⵎⴻⵇⵔⴰⵏ, ⴷⴻⴳ ⵡⴰⴽⵓⴷ ⴰⵢⴷⴻⴳ ⵜⵉⵕⵎⵉⵙⵉⵏ ⵜⵉⵏⴰⴳⴷⵓⴷⵉⵏ (ⵄⵓⵎⵓⵎⵉⵢⵢⴰ) ⴰⴷ ⵊⴻⴱⴷⴻⵏⵜ ⵉⵎⴰⵏ-ⵏⵙⴻⵏⵜ ⵛⵡⵉⵟ, ⵛⵡⵉⵟ ⴷⴻⴳ ⵡⴰⵀⵉⵍⴻⵏ ⵏ ⵜⵏⴻⵣⴷⵓⵖⵜ ⵢⴻⵔⵏⴰ ⴰⴷ ⴷ-ⵍⵀⵓⵏⵜ ⵓⴳⴰⵔ ⵙ ⵡⴰⵀⵉⵍⴻⵏ ⴰⵢⴷⴻⴳ ⵉⵅⵓⵚⵚ ⵓⵎⴻⴷⵅⵓⵍ.

ⵓⴳⴰⵔ ⵏ 273.000 ⵏ ⵜⵏⴻⵣⴷⵓⵖⵉⵏ ⴰⵢ ⴷ-ⵉⴼⵓⴽⴻⵏ ⴷⴻⴳ ⵓⵙⴻⴳⴳⴰⵙ ⵏ 2015.

ⵖⴻⴼ ⵍⴻⵃⵙⴰⴱ ⵏ ⵜⴻⵛⵔⴰⵡⵜ (ⵃⴰⵚⵉⵍⴰ) ⴰⵢ ⴷ-ⵢⴻⵜⵜⵡⴰⵇⴻⴷⴷⵎⴻⵏ ⴷⴻⴳ ⵓⵎⵢⴰⴳⴻⵔ-ⴰ, 102.956 ⵏ ⵜⵏⴻⵣⴷⵓⵖⵉⵏ ⵜⵉⵏⴰⴳⴷⵓⴷⵉⵏ ⵏ ⵍⴻⴽⵔⴰ (ⵜⵉⵏⵎⴻⵜⵜⵉⵢⵉⵏ [ⵉⴵⵜⵉⵎⴰⵄⵉⵢⵢⴰ]), 28.891 ⵏ ⵜⵏⴻⵣⴷⵓⵖⵉⵏ ⵜⵉⵙⵎⴰⵍⴰⵏⵉⵏ ⵢⴻⵜⵜⵡⴰⵄⴰⵡⵏⴻⵏ ⴷ 142.700 ⵏ ⵜⵏⴻⵣⴷⵓⵖⵉⵏ ⵏ ⵓⴳⴰⵎⴰ ⴰⵢ ⴷ-ⵉⴼⵓⴽⴻⵏ.

ⵙⴻⴳ ⵢⵉⴷⵉⵙ ⵏⵉⴹⴻⵏ, 312.519 ⵏ ⵜⵏⴻⵣⴷⵓⵖⵉⵏ ⴰⵢ ⵢⴻⴱⴷⴰⵏ ⵙ ⵍⴻⴱⵏⵉ, ⴳⴰⵔ-ⴰⵙⴻⵏⵜ 67.955 ⵏ ⵜⵏⴻⵣⴷⵓⵖⵉⵏ ⵏ ⵓⴳⴰⵎⴰ ⴷ 44.745 ⵏ ⵜⵏⴻⵣⴷⵓⵖⵉⵏ ⵜⵉⵏⴰⴳⴷⵓⴷⵉⵏ ⵏ ⵍⴻⴽⵔⴰ.

ⵜⵜⵡⴰⵚⴻⵔⵔⴼⴻⵏ 548 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ ⴰⵙⴻⴳⴳⴰⵙ-ⴰ ⵖⴻⴼ ⵍⴻⴱⵏⵉ ⵏ ⵜⵏⴻⵣⴷⵓⵖⵉⵏ, ⵢⴻⵔⵏⴰ 59% ⵙⴻⴳ ⵢⵉⴷⵔⵉⵎⴻⵏ-ⴰ ⵜⵜⵡⴰⵚⴻⵔⵔⴼⴻⵏ ⵖⴻⴼ ⵜⵏⴻⵣⴷⵓⵖⵉⵏ ⵜⵉⵏⵎⴻⵜⵜⵉⵢⵉⵏ.

ⵜⴻⴱⴷⴻⵔ-ⴷ ⴷⴰⵖ ⵜⴻⵛⵔⴰⵡⵜ-ⴰ ⴷ ⴰⴽⴽⴻⵏ ⵜⵜⵡⴰⵇⴻⴱⵍⴻⵏⵜ 1667 ⵏ ⵜⴻⵎⵀⴰⵍ (ⵄⴰⵎⴰⵍⵉⵢⵢⴰⵜ) ⵏ ⵓⵄⴰⵡⴻⴷ ⵏ ⵓⵇⴻⵢⵢⴻⵎ ⵏ ⵢⵉⵙⴻⴼⵔⴰⵏⴻⵏ ⵢⴻⵔⵏⴰⵏ 303.660 ⵏ ⵜⵏⴻⵣⴷⵓⵖⵉⵏ ⵙ ⵙⵙⵓⵎⴰ ⵏ 48 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵉⵏⴰⵕⴻⵏ.

ⵢⴻⵏⵏⴰ-ⴷ ⵎⴰⵙⵙ ⵜⴻⴱⴱⵧⵓⵏⴻ ⴷ ⴰⴽⴽⴻⵏ ⵢⵓⵎⴰⵔ (ⵢⴻⴼⵕⴻⵃ) ⵙ ⵢⵉⵙⵓⵔⵉⴼⴻⵏ ⴰⵢ ⵉⴳⴰ ⵓⵃⵔⵉⵛ ⴷⴻⴳ 2015, ⵢⴻⵔⵏⴰ ⵢⴻⵙⵙⴻⵃⴷⴻⵔ-ⴷ ⵙⴻⴳ ⵢⵉⵔ ⴰⵙⵙⴻⴷⴷⵓ ⵏ ⵍⴻⵛⵖⴰⵍ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵙⵎⴻⴽⵜⵉ ⴷ ⴰⴽⴽⴻⵏ ⴰⴷ ⵜⵜⵡⴰⴷⴷⵎⴻⵏ ⵢⵉⵃⴻⵣⵣⵉⴱⴻⵏ ⴷ ⵉⵇⵓⵔⴰⵏⴻⵏ ⵎⴳⴰⵍ ⵢⵉⵎⴹⴻⴱⴱⵔⴻⵏ ⵓⵔ ⵢⴻⵜⵜⴳⴻⵏ ⴰⵔⴰ ⵍⴻⵛⵖⴰⵍ-ⵏⵙⴻⵏ.