Asebter amenzawi

Ur tettɛeṭṭil ara ad tefru taluft n tnezduɣt

LEZZAYER TAMANEɣT – Yenna-d uneɣlaf n tnezduɣt d temdint, Abdelmadjid Tebboune, ass n ssebt deg Lezzayer Tamaneɣt d akken taluft n tnezduɣt ur tettɛeṭṭil ara ad tefru s ufaki n lebni n 450.000.

« Aql-aɣ la netteddu ad nefru taluft n tnezduɣt imi ay xuṣṣent ala 450.000 n tnezduɣin », ɣef wakken ay d-yenna Mass Tebboune deg yiwen n umyager n uqeyyem n uḥric n tnezduɣt i useggas n 2015.

Mi ad tefru taluft-a n lexṣaṣ n tnezduɣt yellan imir-a, aḥric n tnezduɣt ad d-yelhu ala d yissutren n tnezduɣt ay d-yettilin yal aseggas deg ssuq.

Yenna-d daɣ uneɣlaf d akken mi ad tefru taluft n tnezduɣt, ad urarent teṛmisin (carikat) tusligin dduṛ d ameqran, deg wakud aydeg tiṛmisin tinagdudin (ɛumumiyya) ad jebdent iman-nsent cwiṭ, cwiṭ deg wahilen n tnezduɣt yerna ad d-lhunt ugar s wahilen aydeg ixuṣṣ umedxul.

Ugar n 273.000 n tnezduɣin ay d-ifuken deg useggas n 2015.

ɣef leḥsab n tecrawt (ḥaṣila) ay d-yettwaqeddmen deg umyager-a, 102.956 n tnezduɣin tinagdudin n lekra (tinmettiyin [iǧtimaɛiyya]), 28.891 n tnezduɣin tismalanin yettwaɛawnen d 142.700 n tnezduɣin n ugama ay d-ifuken.

Seg yidis niḍen, 312.519 n tnezduɣin ay yebdan s lebni, gar-asent 67.955 n tnezduɣin n ugama d 44.745 n tnezduɣin tinagdudin n lekra.

Ttwaṣerrfen 548 n yimelyaṛen n yidinaṛen aseggas-a ɣef lebni n tnezduɣin, yerna 59% seg yidrimen-a ttwaṣerrfen ɣef tnezduɣin tinmettiyin.

Tebder-d daɣ tecrawt-a d akken ttwaqeblent 1667 n temhal (ɛamaliyyat) n uɛawed n uqeyyem n yisefranen yernan 303.660 n tnezduɣin s ssuma n 48 n yimelyaṛen n yidinaṛen.

Yenna-d Mass Tebboune d akken yumar (yefṛeḥ) s yisurifen ay iga uḥric deg 2015, yerna yesseḥder-d seg yir asseddu n lecɣal, am wakken ay d-yesmekti d akken ad ttwaddmen yiḥezziben d iquranen mgal yimḍebbren ur yettgen ara lecɣal-nsen.