ⴰⵙⴻⴱⵜⴻⵔ ⴰⵎⴻⵏⵣⴰⵡⵉ
ⵜⴰⵛⴻⵕⵜ ⵏ ⵡⵓⴳⴳⵓⴳⴻⵏ ⵜⴻⵡⵡⴻⴹ ⵖⴻⵔ ⵡⵓⴳⴰⵔ ⵏ 66%
ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⵡⵡⴻⴹ ⵜⴰⵛⴻⵕⵜ ⵏ ⵡⵓⴳⴳⵓⴳⴻⵏ (ⵙⵓⴷⵓⴷ) ⵖⴻⵔ ⵡⵓⴳⴰⵔ ⵏ 66%, ⵢⴻⵔⵏⴰ ⴷ ⵡⴰ ⴰⵢ ⴷ ⴰⵙⵡⵉⵔ ⵏ ⵜⴰⵛⴻⵕⵜ ⵡⵓⵖⵓⵔ ⵜⴻⵙⵙⴰⵡⴻⴹ ⵜⵎⵓⵔⵜ ⵓⵍⴰ ⵉⵍⵉⵏⴷⵉ ⵜⴰⵍⵍⵉⵜ-ⴰ, ⴷⵖⴰ ⴰⵢⴰ ⴰⴷ ⴷ-ⵉⴽⴰⴼⵉ ⵉ ⵓⵙⵙⴻⵕⵡⵓ ⵏ ⵡⴰⵢⴻⵏ ⵜⴻⵃⵡⴰⴵ ⵜⵎⵓⵔⵜ ⴷⴻⴳ ⵜⴰⵍⵍⵉⵜ-ⴰ ⵏ ⵍⴻⵅⵚⴰⵚ ⵏ ⵓⴳⴻⴼⴼⵓⵔ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵙⵙⴻⴱⵜ ⵓⵏⴻⵎⵀⴰⵍ ⴰⵎⴰⵜⵓ ⵏ ⵜⵏⴻⴳⴳⴰ (ⵡⴰⴽⴰⵍⴰ) ⵜⴰⵖⴻⵍⵏⴰⵡⵜ ⵏ ⵡⵓⴳⴳⵓⴳⴻⵏ ⴷ ⵢⵉⵙⵙⴻⴽⴽⵉⵢⴻⵏ, ⴰⵔⴻⵣⴽⵉ ⴱⴰⵔⵔⴰⴽⵉ.
ⵍⴻⵣⵣⴰⵢⴻⵔ ⵜⴻⵙⵄⴰ 72 ⵏ ⵡⵓⴳⴳⵓⴳⴻⵏ ⴰⵢ ⵍⴰ ⵢⴻⵜⵜⵡⴰⵖⴻⵍⵍⴰⵜⴻⵏ ⵢⴻⵔⵏⴰ ⵜⴻⵡⵡⴻⴹ ⵜⵍⴻⵎⵎⴰⵙⵜ-ⵏⵙⴻⵏ ⵏ ⵜⴰⵛⴻⵕⵜ ⵖⴻⵔ 66,93% ⴰⵙⵙ ⵏ ⵙⵙⴻⴱⵜ 26 ⴷⵓⵊⴻⵎⴱⴻⵕ. ⴷⵖⴰ ⵙ ⵡⴰⵢⴰ, ⵓⴳⴳⵓⴳⴻⵏ-ⴰ ⵊⴻⵎⵄⴻⵏ ⴰⵊⴻⵎⵎⴰⵍ ⵏ 4,7 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⵎⵉⵜⵔⴻⵏ ⵉⴳⴰⵙⴰⵙⴻⵏ (ⵎ3) ⵖⴻⴼ ⵍⴻⵃⵙⴰⴱ ⵏ ⵡⴰⵢⴻⵏ ⴰⵢ ⴷ-ⵜⴻⵏⵏⴰ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵡⵓⴳⴳⵓⴳⴻⵏ ⴷ ⵢⵉⵙⵙⴻⴽⴽⵉⵢⴻⵏ.
« ⴷ ⵡⴰ ⴰⵢ ⴷ ⴰⵙⵡⵉⵔ ⴰⵢ ⴷ-ⵢⴻⵍⵍⴰⵏ ⴰⵙⴻⴳⴳⴰⵙ ⵢⴻⵣⵔⵉⵏ ⴷⴻⴳ ⵜⴰⵍⵍⵉⵜ-ⴰ, ⴷⵖⴰ ⴷ ⴰⵢⴰ ⴰⵢ ⴰⵖ-ⵢⴻⴵⴵⴰⵏ ⴰⴷ ⵏⴻⴽⴽ ⴰⵙⴻⴳⴳⴰⵙ ⵢⴻⵍⵀⴰⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴱⴰⵔⵔⴰⴽⵉ ⵎⵉ ⴷ-ⵢⴻⵔⵔⴰ ⵉ ⵢⵉⵏⴻⵖⵎⴰⵙⴻⵏ ⴰⵢ ⵜ-ⵉⴷ-ⵢⴻⵜⵜⵔⴻⵏ ⵖⴻⴼ ⵡⵓⴳⵓⵔ ⴰⵢⵢⴻⵙ ⵢⴻⵣⵎⴻⵔ ⴰⴷ ⴷ-ⵢⴻⴳⵍⵓ ⵍⴻⵅⵚⴰⵚ ⵏ ⵓⴳⴻⴼⴼⵓⵔ ⴷⴻⴳ ⵜⴰⵛⴻⵕⵜ ⵏ ⵡⵓⴳⴳⵓⴳⴻⵏ.
« ⵙ ⵓⵎⴰⵜⴰ, ⴰⵎⴰⵏ ⵔⴻⵏⵏⵓⵏ-ⴷ (ⵖⴻⵔ ⵡⵓⴳⴳⵓⴳⴻⵏ) ⴳⴰⵔ ⵢⴻⵏⵏⴰⵢⴻⵔ ⴷ ⵎⴻⵖⵔⴻⵙ. ⴰⵍⴰ ⴷⴻⴳ ⵜⴰⵍⵍⵉⵜ-ⴰ, ⴰⵢⴷⴻⴳ ⵜⴻⵜⵜⴼⴰⴽⴰ ⵜⴻⴳⵔⴻⵙⵜ, ⴰⴷ ⵏⴻⵣⵎⴻⵔ ⴰⴷ ⵏⵇⴻⵢⵢⴻⵎ ⵜⴰⴳⵏⵉⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ.
ⵎⴰ ⴷ ⴰⵎⴰⵔⵓ ⴰⵎⴰⵜⵓ ⵏ ⵓⵖⵍⵉⴼ ⵏ ⵜⴻⵖⴱⵓⵍⴰ (ⵎⴰⵡⴰⵔⵉⴷ) ⵏ ⵡⴰⵎⴰⵏ ⴷ ⵜⵡⴻⵏⵏⴰⴹⵜ, ⴻⵍ ⵀⴰⴷⵊ ⴱⴻⵍⴽⴰⵜⴻⴱ, ⵢⴻⵏⵏⴰ-ⴷ ⴷ ⴰⴽⴽⴻⵏ ⵉⴼⴻⵍⵍⴰⵃⴻⵏ ⵓⵔ ⵜⴻⵔⵔⵉ ⵜⵎⴰⵔⴰ ⴰⴷ ⴰⴳⴰⴷⴻⵏ ⵉⵎⵉ ⵜⴰⵙⵎⴻⴽⵜⴰ (ⴽⴰⵎⵎⵉⵢⵢⴰ) ⵏ ⵡⴰⵎⴰⵏ ⴰⵢ ⴰⵙⴻⵏ-ⴷ-ⵢⴻⵜⵜⵡⴰⵃⴰⵣⴻⵏ ⵓⵔ ⵜⵏⴻⵇⵇⴻⵙ ⴰⵔⴰ, ⴷ ⴰⵛⵓ ⴽⴰⵏ, ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵖⵍⵉⴼ ⵏ ⵡⴰⵎⴰⵏ ⵎⴰⵛⵉ ⴷ ⵏⴻⵜⵜⴰ ⴰⵢ ⴷ-ⵢⴻⵍⵀⴰⵏ ⴷ ⴼⴻⵔⵔⵓ ⵏ ⵡⵓⴳⵓⵔ ⵏ ⵍⴻⵅⵚⴰⵚ ⵏ ⵡⴰⵎⴰⵏ ⴷⴻⴳ ⵜⴻⵎⵏⴰⴹⵉⵏ ⵓⵔ ⵢⴻⵙⵄⵉⵏ ⴰⵔⴰ ⵜⵜⴰⵡⵉⵍⴰⵜ ⵏ ⵓⵙⵙⵉⵡⴻⴹ ⵏ ⵡⴰⵎⴰⵏ ⴷ ⵓⵙⵙⵡⴰⵢ.
