Asebter amenzawi

Taceṛt n wuggugen tewweḍ ɣer wugar n 66%

LEZZAYER TAMANEɣT – Tewweḍ taceṛt n wuggugen (sudud) ɣer wugar n 66%, yerna d wa ay d aswir n taceṛt wuɣur tessaweḍ tmurt ula ilindi tallit-a, dɣa aya ad d-ikafi i usseṛwu n wayen teḥwaǧ tmurt deg tallit-a n lexṣaṣ n ugeffur, ɣef wakken ay d-yenna ass n ssebt unemhal amatu n Tnegga (wakala) Taɣelnawt n Wuggugen d Yissekkiyen, Arezki Barraki.

Lezzayer tesɛa 72 n wuggugen ay la yettwaɣellaten yerna tewweḍ tlemmast-nsen n taceṛt ɣer 66,93% ass n ssebt 26 Dujembeṛ. Dɣa s waya, uggugen-a jemɛen ajemmal n 4,7 n yimelyaṛen n yimitren igasasen (m3) ɣef leḥsab n wayen ay d-tenna Tnegga Taɣelnawt n Wuggugen d Yissekkiyen.

« D wa ay d aswir ay d-yellan aseggas yezrin deg tallit-a, dɣa d aya ay aɣ-yeǧǧan ad nekk aseggas yelhan », ɣef wakken ay d-yenna Mass Barraki mi d-yerra i yineɣmasen ay t-id-yettren ɣef wugur ayyes yezmer ad d-yeglu lexṣaṣ n ugeffur deg taceṛt n wuggugen.

« S umata, aman rennun-d (ɣer wuggugen) gar Yennayer d Meɣres. Ala deg tallit-a, aydeg tettfaka tegrest, ad nezmer ad nqeyyem tagnit », ɣef wakken ay d-yerna.

Ma d amaru amatu n uɣlif n teɣbula (mawarid) n waman d twennaḍt, El Hadj Belkateb, yenna-d d akken ifellaḥen ur terri tmara ad agaden imi tasmekta (kammiyya) n waman ay asen-d-yettwaḥazen ur tneqqes ara, d acu kan, yenna-d d akken aɣlif n waman maci d netta ay d-yelhan d ferru n wugur n lexṣaṣ n waman deg temnaḍin ur yesɛin ara ttawilat n ussiweḍ n waman d ussway.